باس پروكۋرور بەرىك اسىلوۆ ءماجىلىس دەپۋتاتى ەرمۇرات باپيگە "ەسكى قازاقستانداعى" كلەپتوكراتيا تۋرالى اقپارات بەرگەنى ءۇشىن العىس ءبىلدىردى، دەپ حابارلايدى "ادىرنا" ءتىلشىسى قازتاگ اگەنتتىگىنە سىلتەپ.
6 جەلتوقسان كۇنى دەپۋتات باس پروكۋرورعا "ەسكى قازاقستاننىڭ" شەنەۋنىكتەرى ەل ەكونوميكاسىنا قايتا ارالاسا باستاعانىن ايتىپ، شۇعىل ارەكەت ەتۋدى وتىنگەن. ەرمۇرات باپي ءوز سوزىندە تالعات جۇمادىلداەۆ، سەرىكقالي برەكەشەۆ، قازاقستاندىق كاسىپكەر تيمۋر قۇلىباەۆ سەكىلدى بىرنەشە تۇلعالاردىڭ اتىن دا اتاعان بولاتىن
اسىلوۆ دەپۋتات ەرمۇرات ءباپيدىڭ ساۋالىنا جاۋاپ بەرە وتىرىپ، وعان "كلەپتوكراتتار" تۋرالى اقپاراتى ءۇشىن العىس ءبىلدىردى.
"وسى مۇمكىندىكتى پايدالانا وتىرىپ، جەكە تۇلعالار مەن كومپانيالارعا قاتىستى بەرىلگەن اقپارات ءۇشىن ريزاشىلىعىمىزدى بىلدىرەمىز. ول بەيىندى ۆەدومستۆونىڭ قىزمەتىندە ەسكەرىلەتىن بولادى. وسىعان بايلانىستى باس پروكۋراتۋرا اكتيۆتەرىن قايتارۋ كوميتەتى ءوز قىزمەتىن زاڭدا كوزدەلگەن بارلىق شارالار مەن تەتىكتەردى ىسكە اسىرا وتىرىپ، ۇلتتىق زاڭناما نورمالارىنا سايكەس جۇزەگە اسىرادى. كوميسسيانىڭ بىرنەشە وتىرىسى وتكىزىلدى، بىرقاتار تۇلعالار تىزىلىمگە ەنگىزىلدى، ولارعا حابارلامالار جولداندى جانە دەكلاراتسيا كۇتىلۋدە. كوميتەت اكتيۆتەردىڭ اشىلۋىن كۇتپەستەن ءبىرىنشى كۇننەن باستاپ سۋبەكتىلەر بويىنشا مالىمەتتەر جيناۋ بويىنشا جۇمىس جۇرگىزەدى", - دەدى باس پروكۋرور.
ءوز سوزىندە اسىلوۆ مەملەكەتكە قانشا اكتيۆتىڭ قايتارىلعانىن دا اتاپ ءوتتى.
"مىسالى، بۇگىنگى تاڭدا كوميتەت ساراپشىلارىنىڭ زەرتتەۋىندە سۋبەكتىلەر مەن ولاردىڭ اففيليرلەنگەن تۇلعالارىنىڭ 250 مىڭعا جۋىق بانكتىك ترانزاكتسيالارى بار. بۇگىنگى تاڭدا مەملەكەتكە ت950 ملرد استام اكتيۆتەر قايتارىلدى", - دەپ تولىقتىردى پروكۋرور.
