جىل اياقتالار تۇستا ارقايسىمىز «وتكەن جىلعا وكپە جوق، كەلەر جىلدان ءۇمىت كوپ» دەپ جاتامىز. ال شىن مانىسىندە وتكەن جىلعا وكپەمىز بار ما؟ ءبىر جىلدا ەكى رەت قارالى كۇن جاريالانعانىن ەسكەرسەك «ءوتىپ بارا جاتقان جىل تاماشا بولدى» دەي المايمىز.
ورمان ءورتى كوزىمىزدى اشتى ما؟
اباي وبلىسىندا 8 ماۋسىم كۇنى ورمان ءورتى باستالىپ، ءدۇيىم جۇرتتى دۇرلىكتىردى. وكىنىشكە قاراي ءتىل جاۋمەن كۇرەسكەن 14 ازامات ازامات ءورت ورتاسىندا قالىپ قويىپ، قازا بولدى. مەملەكەت باسشىسى اۋىر جاعدايعا بايلانىستى 12 ماۋسىم كۇنىن ازا تۇتۋ كۇنى دەپ جاريالادى.
سەمەيدەگى ورمان ءورتى توتەنشە جاعداي قىزمەتىنىڭ قاجەتتى كەرەك-جاراقپەن دۇرىس قامتىلماعانىن كورسەتتى. اdyrna.kz ۇلتتىق پورتالى «جەتىسپەيتىن تەمىر، جەتپەيتىن تەڭگە. توتەنشەلىكتەر قايتىپ كورەر؟» ، «ءۇش مەگاپوليس – بايبىشەدەن، 17 وبلىس توقالدان تۋعان با؟ الابوتەن جابدىقتاۋ» جانە «تۇرالاعان تەحنيكا، وڭالماعان ولقىلىق. ماسەلەنىڭ ءورشۋىن كۇتەمىز بە؟» دەگەن تاقىرىپتا ءۇش بىردەي ماقالا جازدى. مىسالى، قىزىلوردا وبلىسى توتەنشە جاعدايلار دەپارتامەنتى ءورت سوندىرۋگە قاجەتتى – 123 ، ال قوستاناي وبلىسى – 53 تجد كولىگى جەتىسپەيتىنىن مالىمدەدى.
ەگەر ءورت سوندىرۋگە قاجەتتى تەحنيكا جەتكىلىكتى بولماسا، ءورتتى دەر كەزىندە ءسوندىرۋ استە مۇمكىن ەمەس.
ەگەر توتەنشە جاعدايلار دەپارتامەنتى قاجەتتى كەرەك جاراقپەن 100 پايىز قامتىلسا، 14 ادام اي امان، جۇرت تىنىشتا قازا تاپپاس پا ەدى، كىم ءبىلسىن؟ ءبىزدىڭ ءبىر بىلەتىنىمىز، جان جاعىن جايپاعان ورمان ءورتىن قولمەن ەمەس، اۋەدەگى تىكۇشاقپەن وشىرسەك، الدەقايدا ءتيىمدى بولار ەدى.
ميتتال بۇعىپ قالدى، لاۆرەنتەۆ كەلىپ الدى
اباي وبلىسىنداعى ورمان ورتىنەن كەيىن قاراعاندى وبلىسىندا قايعىلى جاعداي بولدى. وكىنىشكە قاراي «ارسەلورميتتال تەمىرتاۋ» اق-نا قاراستى كوستەنكو اتىنداعى شاحتادا اپات بولىپ، سونىڭ سالدارىنان 46 شاحتەر قازا تاپتى. مەملەكەت باسشىسى قاسىم-جومارت توقاەۆ 29 قازان كۇنىن جالپىۇلتتىق ازا تۇتۋ كۇنى دەپ جاريالاۋعا ءماجبۇر بولدى.
ۇكىمەتتىڭ وسى اپاتتان كەيىن ارەكەتى ءۇندىستان كاسىپكەرى لاكشمي ميتتالدىڭ مەنشىگىندەگى كومپانيانى الىپ، ونى اندرەي لاۆرەنتەۆتىڭ مەنشىگىنە وتكىزگەندەي اسەر قالدىردى. ۇكىمەت لاۆرەنتەۆتى وتاندىق كاسىپكەر ەكەنىن جانە شاحتانى دامىتۋ ءۇشىن قىرۋار قاردى سالادى سەندىردى. الايدا قوعامدا قوزعالعان «لاۆرەنتەۆ كومپانيانى قانداي قارجىعا ساتىپ الدى؟» دەگەن سۇراققا جاۋاپ ايتىلمادى.
جالپى ورمان ءورتى مەن شاحتاداعى اپات تاحنيكالىق قاۋىپسىزدىكتى ساقتاۋعا ءتيىستى قارجى بولمەگەننەن بولعان سەكىلدى. مۇمكىن قارجى ءبولىنىپ، بىراق ول جەمقورلاردىڭ جەمساۋىندا كەتتى مە ەكەن؟ بۇل ءبىزدىڭ ەلدە ءالى دە بولسا ادىلەتتى مەملەكەت قۇرىلماعانىن كورسەتەدى.
سايلاۋ ساقال سيپاعانشا...
ادىلەتتى مەملەكەت دەمەكشى، بيىل ەلدە سەنات، ءماجىلىس پەن ءماسليحات جانە اۋدان اكىمدەرىنىڭ سايلاۋى ءوتتى. ءماجىلىس پەن ءماسليحات سايلاۋى قىزۋ وتكەنى مەن سەنات جانە اۋدان اكىمى سايلاۋى نازاردان تىس قالدى. مىسالى، قاڭتاردىڭ 14 كۇنى 17 وبلىس پەن ءۇش مەگاپوليستەن 20 سەناتوردى ءماسليحات دەپۋتاتتارى سايلادى. بۇل سايلاۋدىڭ قالاي وتەتىنى ءاۋ باستان بەلگىلى. سوندىقتان دا ول اسا ءبىر تارتىستى ءوتتى دەي المايمىز.
ەسەسىنە ناۋرىزدىڭ 19-ى كۇنى وتكەن ءماجىلىس پەن ءماسليحات سايلاۋى سەناتپەن سالىستىرعاندا تارتىستى ءوتتى. بۇل ساياسي ناۋقاننىڭ قىزىقتى وتۋىنە ماجوريتارلى سايلاۋ جۇيەسى بويىنشا سىنعا تۇسكەن كانديداتتار ۇلەس قوستى. ءتىپتى بىرنەشە ازاماتتار بىرىگىپ، تاۋەلسىز كانديداتتار بلوگىن قۇرىپ، ۇكىمەتتى ۇرەيلەندىرگەندەي بولدى.
بىراق استانادان ءۋاليحان قايساروۆ پەن ارمان شوراەۆ، الماتىدان مۇحتار تايجان مەن سانجار بوقاەۆ سەكىلدى ازاماتتار سايلاۋدا جەڭىسكە جەتە الماي، ساياسي دودانى ادىلەتسىز وتكەنىن مالىمدەدى. سونداي-اق كەيبىر كانديداتتاردى ءار ءتۇرلى سەبەپپەن سايلاۋدان شەتتەتىپ، كانديدات بولۋ مۇمكىندىگىنەن ايىردى.
قازاننىڭ 5-ءى كۇنى ەلىمىزدە تۇڭعىش رەت 42 اۋدان مەن 3 وبلىستىق ماڭىزى بار قالادا اكىم سايلاۋى ءوتتى. بۇل سايلاۋ ءماجىلىس پەن ءماسليحات سايلاۋى سەكىلدى جۇرتتىڭ نازارىن اۋدارتا المادى. وكىنىشكە قاراي، ءبىر سىدىرعى وتكەن سايلاۋ كوپشىلىكتىڭ دەلەبەسىن قوزدىرمادى. ونىڭ ۇستىنە اۋدان اكىمى سايلاۋىنا كانديدات بولعان بىرنەشە ادام ساياسي دوداعا جىبەرىلمەدى. ناقتىراق ايتساق ۇلىتاۋ، ماڭعىستاۋ، تۇركىستان جانە تۇركىساتان وبلىسىنان شىققان ازاماتتار سايلاۋعا جىبەرىلمەدى.
اياقدوپ شەبەرلەرى الاشتى قۋانتتى
بيىل فۋتبولدان قازاقستان ۇلتتىق قۇراماسى سەنساتسيا جاسادى. ءوز الاڭىندا دانيادان 2:0 ەسەبىندە ۇتىلىپ جاتىپ، 3:2 ەسەبىمەن جەڭىسكە جەتتى. ايىپ دوبىنان باقتيەر زاينۋتدينوۆ ەسەپ اشسا، اسحات تاعىبەرگەننىڭ الىستان شىرەنە تەپكەن دوبى مەن ابات ايىمبەتوۆتىڭ باسپەن ۇرعان دوبى گولعا اينالدى. وكىنىشكە قاراي ۇلتتىق قۇراما جىگىتتەرى سلوۆەنياعا قارسى شەشۋشى ويىندا 2:1 ەسەبىمەن ەسە جىبەرىپ، ەۋرو 2024 دوداسىنا بارۋ مۇمكىندىگىنەن ايىرىلدى.
بىراق قازاق فۋتبولشىلارى كەلەر جىلدىڭ ناۋرىز ايىندا گەرمانياعا بارار ءبىر مۇمكىندىگى بار. ەگەر جىگىتتەر گرەكيانى ۇتسا، گرۋزيا مەن ليۋكسەمبۋرگ ويىنىنىڭ جەڭىمپازىمەن كەزدەسەمىز. بۇل سىندا دا جولىمىز بولسا، ەۋرو 2024 جولداما الۋىمىز ابدەن مۇمكىن.
سەرىك جولداسباي،
«ادىرنا» ۇلتتىق پورتالى
