ساتباەۆ قالاسىنىڭ سوتى ۋكراينا اسكەرىنە قارسى سوعىسقان قازاقستاندىقتى 6 جىلعا باس بوستاندىعىنان ايىردى، دەپ حابارلايدى «ادىرنا» ءتىلشىسى press.kz-كە سىلتەمە جاساپ.
تەرگەۋشىلەردىڭ مالىمەتىنشە، لەونيد گ. 2014-2015 جىلدارى ۋكراينا اسكەرىنە قارسى دونباسس جاساقتارىنىڭ قۇرامىندا قارۋلى قاقتىعىسقا قاتىسقان.
قىلمىستىق ءىس ماتەريالدارىنا سايكەس، ەر ادام 1998 جىلى قازاقستاننان بەلورۋسكە كوشىپ، گومەل وبلىسىنا قونىستانعان. 2014 جىلى ۋكرايناعا بارىپ، دونباسس جاساقتارىنىڭ قاتارىنا قوسىلعان. ول شەتەلدىك ديۆەرسيالىق-بارلاۋ توبىندا سنايپەر قىزمەتىن اتقارعان.
باق قازاقستاندىقتىڭ شايقاستا باسىنان كونتۋزيا العان سوڭ بەلارۋسكە ورالعانىن جازادى.
«بۇل جەردە ول قۇقىق قورعاۋ ورگاندارىنىڭ نازارىن اۋداردى. ءتىنتۋ جۇمىستارىنىڭ ناتيجەسىندە ۇيىنەن ءارتۇرلى كاليبرلى پاتروندار مەن جارىلعىش زاتتار تابىلدى. وق-دارىلەردى زاڭسىز ساتىپ العانى جانە الىپ جۇرگەنى ءۇشىن سوتتالعان لەونيد گ. جازاسىن وتەگەننەن كەيىن ءوز ەلىنە جەر اۋدارىلدى»،—دەلىنگەن حابارلامادا.
قازاقستاندا دا ول شەتەلدىك قارۋلى قاقتىعىستارعا قاتىسۋ بابى بويىنشا قىلمىستىق جاۋاپكەرشىلىككە تارتىلدى. ەر ادام ءوز كىناسىن مويىنداماعان. الايدا كۋاگەرلەر ايىپتالۋشىنىڭ اسكەري ەرلىكتەرىمەن ماقتانعانىن راستاپ، ءتىپتى ونىڭ ۋكرايناعا تاعى دا جالدامالى رەتىندە اسكەري قاقتىعىستارعا قاتىسۋعا باراتىنىن ايتقان.
ەسكە سالايىق، بۇعان دەيىن «ۆاگنەر» قۇرامىندا سوعىسقان قازاقستاندىق الەكسەي شومپولوۆ التى جىل سەگىز ايعا سوتتالعان ەدى.
