Sátbaev qalasynyń soty Ýkraına áskerine qarsy soǵysqan qazaqstandyqty 6 jylǵa bas bostandyǵynan aıyrdy, dep habarlaıdy «Adyrna» tilshisi press.kz-ke silteme jasap.
Tergeýshilerdiń málimetinshe, Leonıd G. 2014-2015 jyldary Ýkraına áskerine qarsy Donbass jasaqtarynyń quramynda qarýly qaqtyǵysqa qatysqan.
Qylmystyq is materıaldaryna sáıkes, er adam 1998 jyly Qazaqstannan Belorýske kóship, Gomel oblysyna qonystanǵan. 2014 jyly Ýkraınaǵa baryp, Donbass jasaqtarynyń qataryna qosylǵan. Ol sheteldik dıversııalyq-barlaý tobynda snaıper qyzmetin atqarǵan.
BAQ qazaqstandyqtyń shaıqasta basynan kontýzııa alǵan soń Belarýske oralǵanyn jazady.
«Bul jerde ol quqyq qorǵaý organdarynyń nazaryn aýdardy. Tintý jumystarynyń nátıjesinde úıinen ártúrli kalıbrli patrondar men jarylǵysh zattar tabyldy. Oq-dárilerdi zańsyz satyp alǵany jáne alyp júrgeni úshin sottalǵan Leonıd G. jazasyn ótegennen keıin óz eline jer aýdaryldy»,—delingen habarlamada.
Qazaqstanda da ol sheteldik qarýly qaqtyǵystarǵa qatysý baby boıynsha qylmystyq jaýapkershilikke tartyldy. Er adam óz kinásin moıyndamaǵan. Alaıda kýágerler aıyptalýshynyń áskerı erlikterimen maqtanǵanyn rastap, tipti onyń Ýkraınaǵa taǵy da jaldamaly retinde áskerı qaqtyǵystarǵa qatysýǵa baratynyn aıtqan.
Eske salaıyq, buǵan deıin «Vagner» quramynda soǵysqan qazaqstandyq Alekseı Shompolov alty jyl segiz aıǵa sottalǵan edi.
