2023 جىلى ۇلتتىق قاۋىپسىزدىك كوميتەتى ەسىرتكى بيزنەسىنە قارسى كۇرەس بويىنشا 150-دەن استام وپەراتسيا جۇرگىزدى، دەپ حابارلايدى "ادىرنا" ۇلتتىق پورتالى قر ۇقك ءباسپاسوز قىزمەتىنە سىلتەمە جاساپ.
ناتيجەسىندە، 34 حالىقارالىق جانە 32 وڭىرلىك ەسىرتكى جەتكىزۋ ارنالارى جويىلدى، 36 جاسىرىن ەسىرتكى زەرتحانالارىنىڭ قىزمەتى بەيتاراپتاندىرىلدى.
زاڭسىز اينالىمنان 3,6 توننادان استام ەسىرتكى جانە پسيحوتروپتىق زاتتار، 21,5 توننا شيكى كوكنار سابانى جانە سينتەتيكالىق ەسىرتكى وندىرۋگە پايدالانىلعان 75 تونناعا جۋىق حيميالىق رەاگەنتتەر تاركىلەندى.
تاركىلەنگەن ەسىرتكىنىڭ «نارىقتاعى» قۇنى 20 ميلليارد تەڭگەدەن اسادى، كولەمى ءبىر رەتتىك 17 ميلليونعا جۋىق دوزانى قۇرايدى.
ءتيىستى قىلمىستاردى جاسادى دەگەن كۇدىكپەن 101 ادام سوتتالىپ، تاعى 169 رەسپۋبليكا ازاماتى مەن شەتەلدىكتەرگە قاتىستى سوتقا دەيىنگى تەرگەۋ امالدارى جۇرگىزىلۋدە.
سونداي-اق شەت مەملەكەتتەردىڭ قۇزىرەتتى ورگاندارىمەن قازاقستان ارقىلى ەسىرتكى اكەلۋ جانە ترانزيت ارنالارىنىڭ جولىن كەسۋ بويىنشا 32 بىرلەسكەن وپەراتسيا جۇزەگە اسىرىلدى.
"ادىرنا" ۇلتتىق پورتالى
