سەمەي قالاسىنىڭ ماڭىندا سينتەتيكالىق ەسىرتكى تاراتۋمەن اينالىسقان ستۋدەنتتەر ۇستالدى. بۇل تۋرالى قر ءىىم تجك ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، ءۇش كۇدىكتى دە 18 جاستا جانە جەرگىلىكتى كوللەدجدەردىڭ بىرىندە وقيدى. ولار ەسىرتكى ساتۋشىلاردان Telegram ارنالار مەن پسيحوتروپتىق زاتتاردى ساتاتىن سايتتار ارقىلى تاپسىرىس العان.
ولاردىڭ جۇمىسى سەمەي اۋماعىندا ەسىرتكىنى جەتكىزۋ بولعان. ءتىنتۋ كەزىندە ولاردان جالپى سالماعى 13 گرامنان اساتىن، ۇلكەن ولشەمدى قۇرايتىن سينتەتيكالىق "الفا-پۆپ" ەسىرتكىسى سالىنعان، پوليەتيلەنگە ورالعان 34 تۇيىنشەك تابىلدى.
ۇستالعاندار ۋاقىتشا ۇستاۋ يزولياتورىنا قامالدى. ولار 15 جىلعا دەيىن باس بوستاندىعىنان ايىرىلۋى مۇمكىن.
ەسىرتكى بيزنەسىنە جاستار ادەتتە قوسىمشا جۇمىس ىزدەپ ءجيى ءتۇسىپ كەتەدى. وسى ورايدا پوليتسيا اتا-انالاردى ساق بولۋعا شاقىرادى.
"جۇمىس سيپاتىن تەكسەرمەي سايت اكىمشىسى، كۋرەر رەتىندەگى قىزمەتكە ورنالاسۋ تۋرالى ۇسىنىستاردى قابىلداماڭىزدار. ادەتتە جۇمىس بەرۋشىلەر جوعارى تابىس پەن كەز كەلگەن ۋاقىتتا بيزنەستەن كاسىپتى تاستاپ كەتە الۋ مۇمكىندىگىمەن جاستاردى قىزىقتىرادى. دەگەنمەن ەسىرتكى تاراتۋشىلار مەن ەسىرتكى جەتكىزۋشىلەردى پوليتسيا ۇستاپ، سوت ۇكىمىمەن ۇزاق جىلدارعا باس بوستاندىعىنان ايىرىپ جاتادى", – دەدى پوليتسيا.
”ادىرنا” ۇلتتىق پورتالى
