ەلىمىزدە تاۋەلسىز باق قىزمەتكەرلەرىنە كيبەرشابۋىلدار كوبەيگەن، دەپ حابارلايدى "ادىرنا" ءتىلشىسى قازتاگ-قا سىلتەپ.
جىل باسىنان بەرى بىرنەشە تاۋەلسىز باسىلىم مەن جەكە جۋرناليستەرگە جاسالعان ءتۇرلى شابۋىلدار تۋرالى اقپارات تاراۋدا. بىرنەشە رەداكتسيا DDoS-شابۋىلىنا بايلانىستى ءوز جۇمىسىن ۋاقىتشا توقتاتۋعا ءماجبۇر بولدى.
قازتاگ اگەنتتىگىنىڭ رەداكتسياسى وسى ماسەلەگە قاتىستى پرەزيدەنت اكىمشىلىگىنە، باس پروكۋراتۋراعا، ءىىم، ۇقك، مادەنيەت جانە اقپارات مينيسترلىگى جانە تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە اشىق ۇندەۋ جاساعان بولاتىن.
تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ارنايى مەملەكەتتىك تەحنيكالىق قىزمەتكە جۇگىنگەن. متق بىرنەشە كۇن عانا ءوزىنىڭ تيىمدىلىگىن كورسەتىپ، بىرنەشە ۋاقىتتان سوڭ سايتتىڭ قاۋىپسىزدىگىن قامتاماسىز ەتە المادى.
ال جەلتوقسان ايىنىڭ باسىندا قازاقستاندىق Kursiv.Media باسىلىمىنا ءتىپتى ءبىر جارىم ميللياردقا جۋىق رەت شابۋىل جاسالعان. تاعى ءبىر مىسال - Pro Tenge باسىلىمى بولىپ وتىر. وندا ءالەۋمەتتىك-ەكونوميكالىق جاعداي اياسىندا قازاقستاندىق شەنەۋنىكتەردىڭ نەگىزسىز جانە شامادان تىس شىعىندارى تۋرالى ماتەريالدار جاريالانادى.
ال قوس جۋرناليست اسحات نيازوۆ پەن نازىمگۇل كۇمىسباەۆا جۇمىس ىستەيتىن «وبوجايۋ» جوباسىنىڭ كومانداسى تۇراقتى تۇردە شابۋىلدارعا ۇشىراپ وتىرادى. جاقىندا عانا اسحات نيازوۆ ءوزىنىڭ WhatsApp جەلىسىندەگى پاراقشاسىنىڭ بۇزىلعانىن ايتقان بولاتىن.
كوپتەگەن كيبەرشابۋىلدارعا ۇشىرايتىن جۋرناليست ميحايل كوزاچكوۆ تا ءجيى تەرىس پىكىردەگى حابارلامالاردى الىپ وتىراتىنىن ايتقان.
