تانىمال قازاقستاندىق ءانشى قايرات نۇرتاس "شىمكەنت قالاسىنىڭ قۇرمەتتى ازاماتى" اتاندى.
شىمكەنت قالالىق ءماسليحاتىنىڭ كەزەكتەن تىس 50-سەسسياسىندا شاھاردىڭ بىرنەشە تۇرعىنىنا مارتەبەلى اتاق بەرۋ تۋرالى شەشىمدى دەپۋتاتتار ءبىراۋىزدان قابىلدادى. "قۇرمەتتى ازامات" اتانعانداردىڭ اراسىندا راشكۇل وسپاناليەۆا، قايرات مولداسەيىتوۆ، ەركىن ساتقانباەۆ، ناتاليا رومانوۆا، قايرات نۇرتاس بار، دەپ حابارلادى otyrar.kz پورتالى.
"مۇنداي ستاتۋسقا يە بولعاندار ازىرگە تەك قوعامدىق كولىكتەردە تەگىن قاتىنايدى جانە ارنايى اللەيادا ەسىمدەرى جازىلعان تاقتايشا ىلىنەدى", - دەپ جازدى پورتال.
ايتا كەتەيىك، "شىمكەنت قالاسىنىڭ قۇرمەتتى ازاماتى" اتاعى جىلىنا ءبىر رەت سالتاناتتى تۇردە 10 ادامعا تاپسىرىلادى. مۇنداي اتاق شاھاردى دامىتۋعا ايرىقشا ەڭبەگى سىڭگەن، مەملەكەتتىك جانە قوعامدىق قىزمەتتە جەتىستىگى بار، شىعارماشىلىقتا، بيزنەستە، سپورتتا، قايىرىمدىلىق شارالارىندا بەلسەندىلىك تانىتىپ جۇرگەن ازاماتتارعا بەرىلەدى.
Sputnik.
