ماڭعىستاۋ وبلىسىنداعى بالالار برۋتسەللەز اۋرۋىن ەشكى سۇتىنەن جۇقتىرعانى انىقتالدى، دەپ حابارلايدى "ادىرنا" پورتالى ماڭعىستاۋ وبلىسىنىڭ سانيتارلىق-ەپيدەميولوگيالىق باقىلاۋ دەپارتامەنتىنە سىلتەپ.
"2023 جىلى ماڭعىستاۋ وبلىسىندا برۋتسەللەزدىڭ ءۇش جاعدايى تىركەلدى. تىركەلگەن ءۇش جاعدايدىڭ بارلىعى 14 جاسقا دەيىنگى بالالار. بالالار بۇل اۋرۋدى اۋرۋ جانۋارلاردىڭ (ەشكىلەردىڭ) ءسۇتىن تۇتىنۋ ارقىلى جۇقتىرعانى انىقتالدى", - دەلىنگەن حابارلامادا.
2023 جىلدىڭ كورسەتكىشى 2022 جىلمەن سالىستىرعاندا ماڭعىستاۋدا جەتى جاعدايعا تومەندەدى.
برۋتسەللەز-تىرەك-قيمىل، جۇيكە، جۇرەك-قانتامىر جۇيەسىنە اسەر ەتەتىن، كوبىنەسە مۇگەدەكتىككە اكەلەتىن اۋىر، ەمدەلۋى قيىن جۇقپالى اۋرۋ. ادامداردى جۇقتىرۋ كوزى تەك اۋرۋ جانۋارلار ارقىلى (قوي، ەشكى، ءىرى قارا، شوشقا جانە ت.ب.) بولىپ تابىلادى. برۋتسەللەز ادامدارعا جانۋارلارعا كۇتىم جاساۋ كەزىندە جانە اۋرۋ جانۋارلاردىڭ ەتى مەن ءسۇت ونىمدەرىن پايدالانۋ كەزىندە ساقتىق شارالارى ساقتالماعان جاعدايدا جۇعادى.
