بۇگىن - قازاقستانننىڭ حالىق جازۋشىسى، قازاقستاننىڭ مەملەكەتتىك سىيلىعىنىڭ لاۋرەاتى ساكەن ءجۇنىسوۆتىڭ تۋعانىنا - 90 جىل.
ساكەن ءجۇنىسوۆ 1934 جىلى كوكشەتاۋ وبلىسى، قىزىلتاۋ اۋدانى، كىشكەنەكول اۋىلىندا دۇنيەگە كەلگەن.
ول 1957 جىلى قازاق مەملەكەتتىك ۋنيۆەرسيتەتىن تامامداعاننان كەيىن، ەڭبەك جولىن "پيونەر" (قازىرگى "اقجەلكەن") جۋرنالىندا ادەبي قىزمەتكەر بولىپ باستادى. م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا ادەبيەت ءبولىمىنىڭ مەڭگەرۋشىسى، كسرو ادەبي قورىندا قازاق بولىمشەسىنىڭ ديرەكتورى، قازاقستان جازۋشىلار وداعىنىڭ حاتشىسى قىزمەتتەرىن ابىرويلى اتقاردى.
ساكەن ءجۇنىسوۆ بىرىڭعاي جازۋشىلىقپەن اينالىسقان. جارتى عاسىرعا تاياۋ شىعارماشىلىق ومىرىندە قازاق ادەبيەتىن وركەندەتۋگە ولشەۋسىز ۇلەس قوستى. "اقان سەرى" ديلوگياسى، "جاپانداعى جالعىز ءۇي", "زاماناي مەن اماناي" روماندارى قالىڭ وقىرمان قاۋىمنان دا، ادەبي سىننان دا جوعارى باعا الدى. "اجار مەن اجال", "تۇتقىندار", "قىزىم، ساعان ايتام", "جارالى گۇلدەر", "قوس انار" تاعى باسقا پەسالارى رەسپۋبليكا تەاترلارىندا قويىلدى. ء"ولىارا" پەساسىنا 1986 جىلى قازاقستان رەسپۋبليكاسىنىڭ مەملەكەتتىك سىيلىعى بەرىلدى.
بالالارعا ارنالعان "سوناردا" دەپ اتالاتىن العاشقى كىتاپشاسى 1959 جىلى شىقتى. بۇدان سوڭ، 1961 جىلى جاس جەتكىنشەكتەر ءۇشىن "اجەم مەن ەمشى جانە دارىگەر", 1962 جىلى "كىمنىڭ مەكەنى جاقسى؟", 1983 جىلى "ساقاۋ باتەڭكە" سياقتى ت.ب. كىتاپتارى جارىق كوردى. "وشپەيتىن ىزدەر" پوۆەسىن، 1965 جىلى "جاپانداعى جالعىز ءۇي" رومانىن جازىپ، ورىس تىلىنە 1968 جىلى اۋدارىلعان. "اقان سەرى" ديلوگياسىنىڭ ءبىرىنشى كىتابى 1971 جىلى جارىق كورسە، 1977 جىلى ەكىنشى كىتابى وقىرماندارىنا جول تارتتى، ال 1979 جىلى ورىس تىلىنە اۋدارىلدى. 1987 جىلى "زاماناي مەن اماناي" پوۆەسىن جازدى.
كوپتەگەن شىعارمالارى شەت تىلدەرگە اۋدارىلعان. ل.ن.تولستويدىڭ، س.تسۆەيگتىڭ بىرقاتار اڭگىمەلەرىن، و.ت.گونچاردىڭ "پەرەكوپ", "كوكادىر" روماندارىن قازاق تىلىنە اۋدارعان.
