Búgin - Qazaqstannnyń halyq jazýshysy, Qazaqstannyń Memlekettik syılyǵynyń laýreaty Sáken Júnisovtiń týǵanyna - 90 jyl.
Sáken Júnisov 1934 jyly Kókshetaý oblysy, Qyzyltaý aýdany, Kishkenekól aýylynda dúnıege kelgen.
Ol 1957 jyly Qazaq memlekettik ýnıversıtetin támamdaǵannan keıin, eńbek jolyn "Pıoner" (qazirgi "Aqjelken") jýrnalynda ádebı qyzmetker bolyp bastady. M. Áýezov atyndaǵy Qazaq memlekettik akademııalyq drama teatrynda ádebıet bóliminiń meńgerýshisi, KSRO Ádebı qorynda Qazaq bólimshesiniń dırektory, Qazaqstan Jazýshylar odaǵynyń hatshysy qyzmetterin abyroıly atqardy.
Sáken Júnisov biryńǵaı jazýshylyqpen aınalysqan. Jarty ǵasyrǵa taıaý shyǵarmashylyq ómirinde qazaq ádebıetin órkendetýge ólsheýsiz úles qosty. "Aqan seri" dılogııasy, "Japandaǵy jalǵyz úı", "Zamanaı men Amanaı" romandary qalyń oqyrman qaýymnan da, ádebı synnan da joǵary baǵa aldy. "Ajar men ajal", "Tutqyndar", "Qyzym, saǵan aıtam", "Jaraly gúlder", "Qos anar" taǵy basqa pesalary Respýblıka teatrlarynda qoıyldy. "Óliara" pesasyna 1986 jyly Qazaqstan Respýblıkasynyń Memlekettik syılyǵy berildi.
Balalarǵa arnalǵan "Sonarda" dep atalatyn alǵashqy kitapshasy 1959 jyly shyqty. Budan soń, 1961 jyly jas jetkinshekter úshin "Ájem men emshi jáne dáriger", 1962 jyly "Kimniń mekeni jaqsy?", 1983 jyly "Saqaý báteńke" sııaqty t.b. kitaptary jaryq kórdi. "Óshpeıtin izder" povesin, 1965 jyly "Japandaǵy jalǵyz úı" romanyn jazyp, orys tiline 1968 jyly aýdarylǵan. "Aqan seri" dılogııasynyń birinshi kitaby 1971 jyly jaryq kórse, 1977 jyly ekinshi kitaby oqyrmandaryna jol tartty, al 1979 jyly orys tiline aýdaryldy. 1987 jyly "Zamanaı men Amanaı" povesin jazdy.
Kóptegen shyǵarmalary shet tilderge aýdarylǵan. L.N.Tolstoıdyń, S.veıgtiń birqatar áńgimelerin, O.T.Gonchardyń "Perekop", "Kókadyr" romandaryn qazaq tiline aýdarǵan.
