وسىدان 99 جىل بۇرىن 1925 جىلى قازاقستان استاناسى ورىنبوردان قىزىلورداعا كوشىرىلگەن بولاتىن.
1925 جىلدىڭ 9 اقپانىندا قازاق اكسر واك تورالقاسى و.يساەۆتىڭ بايانداماسى بويىنشا مەملەكەت استاناسىن ورىنبوردان اقمەشىتكە كوشىرۋ تۋرالى شەشىم شىعاردى.
سول جىلى 15-19 ساۋىردە اقمەشىتتە وتكەن كەڭەستەردىڭ بۇكىلقازاقستاندىق V سەزىندە حالقىمىزدىڭ ورىسشا «كيرگيز» دەپ اتالۋىن «قازاق»، «كيرگيز اكسر» اتاۋىن «قازاق اكسر» دەپ وزگەرتۋ، ال رەسپۋبليكا استاناسى اقمەشىت قالاسىنىڭ اتاۋىن قىزىلوردا دەپ اتاۋ تۋرالى قاۋلى قابىلداندى. 1925 جىلدىڭ كوكتەمى مەن جازىندا مەملەكەتتىك باسقارۋ ورگاندارى سىر بويىنا كوشىرىلدى. ورىنبور شاھارى مەن گۋبەرنياسى رەسەي فەدەراتسياسى قۇرامىنا بەرىلدى. جاڭا استانا قۇرىلىسىنا جانە قىزىلوردانىڭ قازاقستاننىڭ ساياسي، ەكونوميكالىق جانە مادەني ورتالىق رەتىندەگى قىزمەتىن ورنىقتىرۋعا س.قوجانوۆ، ت.رىسقۇلوۆ، ج.مىڭباەۆ، ن.نۇرماقوۆ، م.تىنىشپاەۆ، ا.كەنجين، س.اقاەۆ، ا.سەرعازين، و.يساەۆ، س.سادۋاقاسوۆ، س.ەسقاراەۆ، ت.ب. قوعام قايراتكەرلەرى بەلسەندى قاتىستى.
كەيىن سىر بويىنىڭ ەكونوميكالىق جانە تابيعي جاعدايى قولايسىز دەگەندى جەلەۋ ەتكەن ف.ي. گولوششەكين باسقارعان بك(ب)پ قازاق ولكەلىك كوميتەتتى ەل استاناسىن قىزىلوردادان ورىسى باسىم الماتىعا اۋىستىرۋدى ءجون دەپ تاپتى. 1927 جىلى 3 ناۋرىزدا قازاقستان استاناسىن الماتىعا كوشىرۋ جونىندە قازاق اكسر-ءى واك مەن رەسپۋبليكا حكك-ءنىڭ قاۋلىسى جاريالاندى.
