قىزىلوردا وبلىسىنىڭ بۇرىنعى اكىمى نۇرلىبەك نالىباەۆ قازاقستان پرەمەر-ءمينيسترىنىڭ ءبىرىنشى ورىنباسارى بولىپ تاعايىندالدى. بۇل تۋرالى بۇگىن، 6 مامىردا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ جارلىعىمەن نۇرلىبەك ماشبەكۇلى نالىباەۆ قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى»،-دەلىنگەن حابارلامادا.
نۇرلىبەك نالىباەۆ 2022 جىلدىڭ ساۋىرىنەن بۇگىنگە دەيىن قىزىلوردا وبلىسىن باسقارعان بولاتىن.
ايتا كەتەيىك، بۇعان دەيىن پرەمەر-ءمينيستردىڭ ءبىرىنشى ورىنباسارى لاۋازىمىن رومان سكليار اتقارعان ەدى.
نۇرلىبەك نالىباەۆ 1976 جىلى قىزىلوردا وبلىسىندا تۋعان. قازاق مەملەكەتتىك اگرارلىق ۋنيۆەرسيتەتىن، قازاق گۋمانيتارلىق زاڭ ۋنيۆەرسيتەتىن بىتىرگەن. ەڭبەك جولىن 1997–1998 جىلدارى ارالىعىندا «كازاحويل-كوممەرتسيا» جشس مۇناي جانە مۇناي ءوندىرىسى ساراپشىسى بولىپ باستاعان. 1998-2005 جىلدارى جەكە كوممەرتسيالىق قۇرىلىمداردا باسشىلىق قىزمەتتەر اتقارعان. 2005-2007 جىلدارى قىزىلوردا قالاسى اكىمىنىڭ ورىنباسارى، ءبىرىنشى ورىنباسارى، 2007-2008 جىلدارى قىزىلوردا وبلىسى اكىمى اپپاراتىنىڭ باسشىسى، 2008-2013 جىلدارى قىزىلوردا وبلىسى، شيەلى اۋدانىنىڭ اكىمى بولعان. ال 2013-2021 جىلدارى قىزىلوردا وبلىسى، قىزىلوردا قالاسىنىڭ اكىمى، 2021-2022 جىلدارى قازاقستان رەسپۋبليكاسى پرەمەر-ءمينيسترى كەڭسەسىنىڭ وڭىرلىك دامۋ ءبولىمىنىڭ مەڭگەرۋشىسى مىندەتتەرىن اتقارعان. Cودان بەرىدە قىزىلوردا وبلىسى اكىمى بولعان.
كوبىنە ايماقتا اكىمدىك قىزمەتىندە بولعان نۇرلىبەك نالىباەۆتىڭ بەلگىلى شەنەۋنىك مارقۇم بەردىبەك ساپارباەۆتىڭ نەمەرە ءىنىسى ەكەنى ايتىلادى.
