ۇلتتىق قاۋىپسىزدىك كوميتەتى «ديكي ارمان» دەگەن اتپەن تانىمال كريمينال جەتەكشىسى ارمان جۇماگەلديەۆ پەن الماتى قالالىق ءماسليحاتىنىڭ بۇرىنعى دەپۋتاتى قايرات قۇدايبەرگەننىڭ قازىر قايدا ەكەنىن ايتتى، دەپ حابارلايدى “ادىرنا” ۇلتتىق پورتالى.
كوميتەتتىڭ Tengrinews.kz سايتىنىڭ سۇراعىنا جولدانعان جاۋابىندا ايتىلعانداي، ق.قۇدايبەرگەننىڭ قايدا وتىرعانى تۋرالى اقپارات ىشكى ىستەر مينيسترلىگىنىڭ قۇزىرىندا.
«ارمان جۇماگەلديەۆكە قاتىستى، ونىڭ الماتى قالاسىنداعى ۇقك-ءنىڭ تەرگەۋ يزولياتورىندا جالپى نەگىزدە، ءتيىستى نورماتيۆتىك قۇقىقتىق اكتىلەردىڭ تالاپتارىن قاتاڭ ساقتاي وتىرىپ، قاماۋدا وتىرعانىن حابارلايمىز. وعان قاتىستى ءىستى باس پروكۋراتۋرانىڭ جەتەكشىلىگىمەن ۆەدومستۆوارالىق جەدەل-تەرگەۋ توبى تەرگەپ جاتىر»، - دەلىنگەن ۇقك حابارلاماسىندا.
كوميتەت ولاردا باسقا اقپارات جوق ەكەنىن ايتتى.
ايتا كەتەيىك، ەكى ازامات تا 2022 جىلدىڭ باسىندا الماتىدا بولعان قاڭتار وقيعاسى كەزىندەگى جاپپاي تارتىپسىزدىكتەردى ۇيىمداستىردى جانە وعان قاتىستى دەگەن كۇدىككە ىلىنگەن بولاتىن.
تەرگەۋ ناتيجەلەرىندە قۇدايبەرگەننىڭ جۇماگەلديەۆپەن بىرگە الماتىداعى «قازاقستان» قوناقۇيىندە ادامداردى جيناعانىن انىقتادى. تەرگەۋشىلەردىڭ ايتۋىنشا، قۇدايبەرگەن جۇماگەلديەۆتىڭ توڭىرەگىنە توپتاسىپ، ونى قولداۋعا جانە بيلىككە ورتاق تالاپتار قويۋعا شاقىرعان.
قايرات قۇدايبەرگەن 2022 جىلدىڭ 22 ساۋىرىندە ۇستالىپ، سول كۇننەن باستاپ قاماۋدا وتىر. ديكي ارمان سول جىلدىڭ 7 قاڭتارىندا ۇستالدى.
“ادىرنا” ۇلتتىق پورتالى
