ەل پرەزيدەنتى قاسىم-جومارت توقاەۆ ۇلتتىق قۇندىلىعىمىز قۇماي تازى تۇقىمدارىن دامىتۋ جونىندە كوپتەگەن تاپسىرمالار بەرىپ، الەمدىك دەڭگەيدە تانىتۋعا جول اشتى. سونىڭ دالەلى فرانتسيا پرەزيدەنتىنە تازى كۇشىكتەرىن سىيلاۋى.
وسىعان وراي ەلىمىزدە تازىلاردى دامىتۋعا ءتۇرلى ءىس-شارالار جۇرگىزىلۋدە. 9-شى اقپان كۇنى كوكشەتاۋ قالاسىندا قازاقستان كينولوگتار وداعى كورمە وتكىزىپ، وسى وڭىردەن 39 تازى جينالدى. ءبىرازى اۋا-رايىنىڭ قولايسىزدىعىنا بايلانىستى كەلە المادى.
الماتى، استانا قالالارىنان ارنايى ماماندار (ەكسپەرت-كينولوگتار) شاقىرىلدى. كورمەنىڭ ماقساتى تازىلارعا قۇجات جاساۋ جانە وڭىردەگى تازى سانىن انىقتاۋ. قازاقستان كينولوگتار وداعى باسقارماسىنىڭ اتىنان جەرگىلىكتى اكىمشىلىك پەن سپورت باسقارمالارىنان كورمە وتەتىن ورىن سۇراپ ەدى...
قازاقستاندا شەت ەلدەردەگىدەي ارنايى ءۇي جانۋارلارىنا ارنالعان كورمە ورىندارى بولماسا دا، ەلىمىزدىڭ وزگە وڭىرلەرىندە فۋتزال، سپورتزال نەمەسە وزگەدە جابىق الاڭدار بەرىلەدى.
ال ءبىزدىڭ باسشىلاردىڭ تازى جاناشىرلارى مەن ارنايى ماماندارعا بەرگەن قويماسىندا (گاراج) نە جىلۋ جوق، نە اياق بۇگىپ وتىراتىن جەر جوق.
ساعات 12.00-دەن 20.00-گە دەيىن توڭىپ، قاتىسۋشىلارعا ەش جاعداي جاسالماعان. عيماراتتىڭ ىشىندەگى تەحنيكالىق مايدىڭ، جانارمايدىڭ يىسىنەن كوبىنىڭ باسى اۋىردى.
قاتىسۋشىلار اراسىنداعى ۇلكەن جاستاعى اعالارىمىزبەن الماتى، استانا قالاسىنان كەلگەن مامانداردان ۇيات بولدى.
بۇل ءبىزدىڭ باسشىلاردىڭ ۇلت قۇندىلىعىن ساقتاپ جۇرگەن جاناشىرلارمەن ماماندارىنا دەگەن كوز قاراسىن اڭعارتادى.
وسىنداي كورمەلەر بولماسا تازىلارىمىزعا قۇجات جاسالمايدى. ءبىزدىڭ ءوڭىر باسشىلارى پرەزيدەنتىمىز سياقتى تازىمىز بەن تازى باعىپ وتىرعان ازاماتتارعا جاندارى اشىسا عوي. جوق، ولاي بولماي تۇر.
اقپان ايىنىڭ 25-ءى تاعى دا كورمە وتپەكشى، الايدا اكىمشىلىك تاراپىنان تاعى دا قولداۋ بولماي تۇر... كىمگە بارىپ، كىمگە شاعىنارىمىزدى بىلمەي وتىرمىز...
«كوكشە قۇماي تازى» قوعامدىق بىرلەستىگى.
