ارىس قالاسىندا 779 تۇلەك ۇبت تاپسىرۋعا ءوتىنىش بەرگەن. 30 ماۋسىمعا دەيىن جالعاساتىن بايقاۋ سىناعىنا ارىس قالاسىنىڭ تۇلەكتەرى تولىقتاي قاتىسىپ ۇلگەرە الدى ما؟ بۇل سۇراققا قر ءبىلىم جانە عىلىم مينيسترلىگى جوعارى جانە جوعارى وقۋ ورىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ جاۋاپ بەردى.
«ارىستا ۇلتتىق بىرىڭعاي تەست تاپسىراتىن ءبىر پۋنكت بولاتىن. ول قالاداعى №1 مەكتەپتە ورنالاسقان. جالپى، بۇل وڭىردە 779 تۇلەك تەست تاپسىرۋعا ءوتىنىش قالدىعان ەدى. سونىڭ ىشىندە 772-ءسى تەستىلەۋدەن ءوتتى. ياعني 98 % تاپسىردى. ولار 21 جانە 23 ماۋسىم كۇندەرى ەكى لەكپەن تاپسىردى. كەشە 24 ماۋسىمدا ساعات 09:00-دە اپەللياتسيالىق №1 مەكتەبىندە اپەللياتسيالىق كوميسسيا ءوز جۇمىسىن باستاعان بولاتىن. وكىنىشكە قاراي، سول ۋاقىتتا اسكەري بولىمشەدەگى جارىلىستان كەيىن كوميسسيا جۇمىسى توقتاپ قالدى»، - دەيدى ادىلەت تويباەۆ.
ونىڭ ايتۋىنشا، زارداپ شەككەن ەشكىم جوق. ارىس قالاسىندا ءبىلىم جانە عىلىم مينيسترلىگىنىڭ 12 وكىلى جۇمىس ىستەگەن.
«قازىرگى ۋاقىتتا مينيسترلىكتىڭ 12 مۇشەسى شىمكەنت قالاسىندا. ەندى، 10-ى ەلورداعا قايتادى. تەك كوميسسيا توراعاسى سوندا قالادى. جاعداي تۇراقتالعان سوڭ بۇل اپەللياتسيانى وتكىزەتىن بولامىز. ويتكەنى، اپەللياتسيانى وتكىزىپ ۇلگەرمەدىك. ءالى 30 ماۋسىمعا دەيىن ۋاقىتىمىز بار. ەگەر ۇلگەرمەي جاتساق، ونىڭ ۋاقىتىن سوزامىز»، - دەدى مينيسترلىك وكىلى.
