يراندا ايەلدەر قۇقىعى مەن رەپرەسسياعا قارسى كۇرەسىمەن تانىمال قۇقىق قورعاۋشى، بەيبىتشىلىك سالاسىنداعى نوبەل سىيلىعىنىڭ لاۋرەاتى نارگيز موحاممادي تاعى دا قاماۋعا الىندى، دەپ حابارلايدى "ادىرنا" ۇلتتىق پورتالى BILD باسىلىمىنا سىلتەپ.
دەرەككوز مالىمەتىنشە، موحاممادي ساياسي تۇتقىنداردى بىرنەشە رەت قورعاعان، جاقىندا قايتىس بولعان ادۆوكات ءارى قۇقىق قورعاۋشى حوسروۆا اليكورديدى ەسكە الۋ شاراسى كەزىندە ۇستالعان.
وسىلايشا نارگيز موحاممادي 14-رەت قاماۋعا الىنۋى. 2016 جىلى ول ءولىم جازاسىنا قارسى ادام قۇقىقتارى قوزعالىسىن باسقارعانى ءۇشىن 16 جىلعا باس بوستاندىعىنان ايىرىلعان. 2024 جىلدىڭ جەلتوقسانىندا اياعىنا جاسالعان وپەراتسيادان كەيىن مەديتسينالىق سەبەپتەرمەن ۋاقىتشا بوساتىلعانىمەن، ونىڭ جازاسى كەيىن بىرنەشە رەت ۇزارتىلعان.
ۇكىمەتتىڭ قىسىمىنا قاراماستان، موحاممادي نارازىلىق اكتسيالارىنا قاتىسۋىن جالعاستىرعان. ول بۇعان دەيىن ءوزى وتىرعان تەگەرانداعى اتىشۋلى ەۆين تۇرمەسىنىڭ الدىندا دا شەرۋ وتكىزگەن. ەۆين تۇرمەسى ازاپتاۋ، تۇتقىنداردى ۇزاق ۋاقىت وقشاۋ كامەرادا ۇستاۋ جانە مىڭداعان ساياسي تۇتقىندى نەگىزسىز قاماۋ جاعدايلارىمەن تانىمال.
BILD مالىمەتىنشە، نارگيز موحاممادي قامالعان كەزىندە بىرنەشە رەت ينفاركت العان.
ايتا كەتەيىك، 31 جىلعا سوتتالعان نارگيز موحاممادي 2023 جىلى بەيبىتشىلىك سالاسىنداعى نوبەل سىيلىعىنا يە بولدى. ول ايەلدەر قۇقىعىن قورعاۋ جانە ءولىم جازاسىن جويۋدى جاقتايتىن بەلسەندىلەردىڭ ءبىرى رەتىندە حالىقارالىق دەڭگەيدە تانىلعان.
