«مەنىڭ ءپىرىم – ءسۇيىنباي» ءداستۇرلى VIII حالىقارالىق جاس اقىندار ايتىسى ءوز مارەسىنە جەتتى، دەپ حابارلايدى “ادىرنا” ءتىلشىسى.
2024 جىلدىڭ 22-23 اقپانىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ۇيىمداستىرۋىمەن «مەنىڭ ءپىرىم – ءسۇيىنباي» ءداستۇرلى VIII حالىقارالىق جاس اقىندار ايتىسى ءوتىپ، كىل مىقتى انىقتالدى.
بۇل سايىستىڭ ماقساتى – ايتىس ونەرىن جاستار اراسىندا كەڭىنەن ناسيحاتتاۋ، اقىندىق ءداستۇردى جاڭعىرتۋ، جاس اقىنداردىڭ قابىلەتتەرى مەن شەشەندىك ونەرىن شىڭداۋ، ولاردىڭ كوپشىلىككە تانىلۋىنا مۇمكىندىك جاساۋ، ءتول ونەرىمىزدى دارىپتەۋ.
جىل سايىن ءداستۇرلى تۇردە وتەتىن جىر دوداسىنا ەلىمىزدىڭ جوو-نىڭ جاس جۇيرىكتەرىمەن قاتار، قىرعىزستان، موڭعوليا، وزبەكستان سىندى شەتەلدەن كەلەتىن جالپى سانى 40-قا جۋىق اقىندار قاتىستى.
الامان ايتىستا توپ جارعاندار قۇندى سىيلىقتارمەن ماراپاتتالدى. قازاقتىڭ «ءۇش بايتەرەگى» ساكەن سەيفۋللين، ءىلياس جانسۇگىروۆ، بەيىمبەت ءمايليننىڭ 130 جىلدىعىنا ارنالعان الامان ايتىستىڭ باس جۇلدەسىن - الكەي مارعۇلان اتىنداعى پەداگوگيكالىق ۋنيۆەرسيتەتتىڭ ستۋدەنتى قايداروۆ بەكسۇلتان الدى. جەڭىمپازعا 500.000 تەڭگە كولەمىندە اقشالاي سىيلىق تارتۋ ەتىلدى.
ال ءى ورىندى العان موڭعوليا ەلىنىڭ جاس جۇيرىگى اديلحان ىڭكاربەككە 400 000 تەڭگە، ءىى ورىنعا جايعاسقان قازاق ۇلتتىق ونەر ۋنيۆەرسيتەتىنىڭ ستۋدەنتى قونارباي مۇحتار مەن قورقىت اتا اتىنداعى كىزىلوردا ۋنيۆەرسيتەتىنىڭ ستۋدەنتى ەرجىگىت ديلنازعا 300.000 تەڭگە تابىستالدى. ءىىى ورىندى - قىرعىزستاننىڭ جاس اقىنى قالىبەكۇلى ىرىسكەلدى مەن قازاق ۇلتتىق ونەر ۋنيۆەرسيتەتىنىڭ ستۋدەنتى ومىربەكوۆ نۇرداۋلەت جانە كاسپي ءوڭىرى بولاشاق كوللەدجىنىڭ ستۋدەنتى اليەۆ جانبولات قانجىعاسىنا بايلادى.
ودان بولەك، «تەمىرحان تەبەگەنوۆ» اتىنداعى ارنايى جۇلدەنى ى.التىنسارين اتىنداعى ارقالىق پەداگوگيكالىق ينستيتۋتىنىڭ ستۋدەنتى اقىلجانوۆ اسەت، «ورازالى دوسبوسىنوۆ» اتىنداعى ارنايى جۇلدەنى وزبەكستاننىڭ جاس جۇيرىگى قوجامۇراتوۆ رينات، «ەسەنقۇل جاقىپبەك» اتىنداعى ارنايى جۇلدەنى قازاق ۇلتتىق ونەر ۋنيۆەرسيتەتىنىڭ ستۋدەنتى ەرگاليەۆ اليحان، «ەرىك اسقاروۆ» اتىنداعى ارنايى جۇلدەنى ءو.جانىبەكوۆ اتىنداعى وقپۋ ۋنيۆەرسيتەتىنىڭ ستۋدەنتى ءساۋىرحان سۇلتان، «اسەلحان قالىبەكوۆا» اتىنداعى ارنايى جۇلدە قورىن قازاق ۇلتتىق ونەر ۋنيۆەرسيتەتىنىڭ ستۋدەنتى تولەنبەك نۇرتىلەۋ، «جارقىنبەك ناۋشابەكوۆ» اتىنداعى ارنايى جۇلدەنى شاكارىم ۋنيۆەرسيتەتىنىڭ ستۋدەنتى ەركىنۇلى قۋانىش، «قونىسباي ءابىلوۆ» اتىنداعى ارنايى جۇلدەنى ءا.مارعۇلان اتىنداعى پەداگوگيكالىق ۋنيۆەرسيتەتىنىڭ ستۋدەنتى تاۋەكەلوۆ نۇرسەرىك، «ازىمبەك جانقۇليەۆ» اتىنداعى ارنايى جۇلدەنى م.دۋلاتي اتىنداعى تاراز وڭىرلىك ۋنيۆەرسيتەتىنىڭ ستۋدەنتى باتەي ايات، قر مادەنيەت قايراتكەرى، «زەينوللا سانىك» اتىنداعى مادەنيەت قورىنىڭ جۇلدەلەرىن اباي اتىنداعى قازۇپۋ ستۋدەنتتەرى داياربەك سانجار مەن ساۋلەت نۇرشاپاعات يەلەنسە، «دارا دارىن» جوباسىنىڭ ارنايى جۇلدەسىن وزبەكستاننىڭ اقىنى قوجامۇراتوۆ رينات، «وزبەكالى جانىبەكوۆ» اتىنداعى ارنايى جۇلدەنى قازاق ۇلتتىق ونەر ۋنيۆەرسيتەتىنىڭ ستۋدەنتى كادىرباي باتىرجان الدى.
ايتىس «الاتاۋ» ءداستۇرلى ونەر تەاترىنىڭ قولداۋىمەن، «ASSYLTAS» قوعامدىق قورىنىڭ قۇرىلتايشىسى دۋلات تاستەكەەۆتىڭ دەمەۋشىلىگىمەن ءوتتى. ەكى كۇندىك شاراعا: قر ەڭبەك سىڭىرگەن قايراتكەرى، «وتان» وردەنىنىڭ يەگەرى، «ايتىس اقىندارى مەن جىرشى-تەرمەشىلەردىڭ حالىقارالىق وداعى» رقب باسقارما توراعاسى ءجۇرسىن ەرمان، قر پارلامەنتى ءماجىلىسىنىڭ دەپۋتاتى، قر ەڭبەك سىڭىرگەن قايراتكەرى، بەلگىلى ايتىسكەر اقىن امانجول التاەۆ، قر مادەنيەت قايراتكەرى، بەلگىلى ايتىسكەر اقىن سەرىك قاليەۆ، التىن دومبىرا يەگەرى، ايتىستىڭ اقتاڭگەرى ەركەبۇلان قاينازاروۆ، فيلولوگيا عىلىمدارىنىڭ دوكتورى، پروفەسسور بالتاباي ابدىعازيۇلى قازىلىق ەتتى. ال ءسوز بايگەسىن ايتىسكەر اقىن، و.دوسبوسىنوۆ اتىنداعى اقىندار مەكتەبىنىڭ جەتەكشىسى شۇعايىپ سەزىمحانۇلى جۇرگىزدى.
