«Meniń pirim – Súıinbaı» dástúrli VIII halyqaralyq jas aqyndar aıtysy óz máresine jetti, dep habarlaıdy “Adyrna” tilshisi.
2024 jyldyń 22-23 aqpanynda Abaı atyndaǵy qazaq ulttyq pedagogıkalyq ýnıversıtetiniń uıymdastyrýymen «Meniń pirim – Súıinbaı» dástúrli VIII halyqaralyq jas aqyndar aıtysy ótip, kil myqty anyqtaldy.
Bul saıystyń maqsaty – aıtys ónerin jastar arasynda keńinen nasıhattaý, aqyndyq dástúrdi jańǵyrtý, jas aqyndardyń qabiletteri men sheshendik ónerin shyńdaý, olardyń kópshilikke tanylýyna múmkindik jasaý, tól ónerimizdi dáripteý.
Jyl saıyn dástúrli túrde ótetin jyr dodasyna elimizdiń JOO-nyń jas júırikterimen qatar, Qyrǵyzstan, Mońǵolııa, Ózbekstan syndy shetelden keletin jalpy sany 40-qa jýyq aqyndar qatysty.
Alaman aıtysta top jarǵandar qundy syılyqtarmen marapattaldy. Qazaqtyń «Úsh báıteregi» Sáken Seıfýllın, Ilııas Jansúgirov, Beıimbet Maılınniń 130 jyldyǵyna arnalǵan alaman aıtystyń Bas júldesin - Álkeı Marǵulan atyndaǵy pedagogıkalyq ýnıversıtettiń stýdenti Qaıdarov Beksultan aldy. Jeńimpazǵa 500.000 teńge kóleminde aqshalaı syılyq tartý etildi.
Al I oryndy alǵan Mońǵolııa eliniń jas júırigi Adılhan Ińkárbekke 400 000 teńge, II orynǵa jaıǵasqan Qazaq Ulttyq óner ýnıversıtetiniń stýdenti Qonarbaı Muhtar men Qorqyt ata atyndaǵy Kyzylorda ýnıversıtetiniń stýdenti Erjigit Dılnazǵa 300.000 teńge tabystaldy. III oryndy - Qyrǵyzstannyń jas aqyny Qalybekuly Yryskeldi men Qazaq Ulttyq óner ýnıversıtetiniń stýdenti Ómirbekov Nurdaýlet jáne Kaspıı óńiri Bolashaq kolledjiniń stýdenti Alıev Janbolat qanjyǵasyna baılady.
Odan bólek, «Temirhan Tebegenov» atyndaǵy arnaıy júldeni Y.Altynsarın atyndaǵy Arqalyq pedagogıkalyq ınstıtýtynyń stýdenti Aqyljanov Aset, «Orazaly Dosbosynov» atyndaǵy arnaıy júldeni Ózbekstannyń jas júırigi Qojamuratov Rınat, «Esenqul Jaqypbek» atyndaǵy arnaıy júldeni Qazaq Ulttyq óner ýnıversıtetiniń stýdenti Ergalıev Alıhan, «Erik Asqarov» atyndaǵy arnaıy júldeni Ó.Jánibekov atyndaǵy OQPÝ ýnıversıtetiniń stýdenti Sáýirhan Sultan, «Áselhan Qalybekova» atyndaǵy arnaıy júlde qoryn Qazaq ulttyq óner ýnıversıtetiniń stýdenti Tólenbek Nurtileý, «Jarqynbek Naýshabekov» atyndaǵy arnaıy júldeni Shákárim ýnıversıtetiniń stýdenti Erkinuly Qýanysh, «Qonysbaı Ábilov» atyndaǵy arnaıy júldeni Á.Marǵulan atyndaǵy pedagogıkalyq ýnıversıtetiniń stýdenti Taýekelov Nurserik, «Ázimbek Janqulıev» atyndaǵy arnaıy júldeni M.Dýlatı atyndaǵy Taraz óńirlik ýnıversıtetiniń stýdenti Báteı Aıat, QR Mádenıet qaıratkeri, «Zeınolla Sánik» atyndaǵy mádenıet qorynyń júldelerin Abaı atyndaǵy QazUPÝ stýdentteri Daıarbek Sanjar men Saýlet Nurshapaǵat ıelense, «Dara Daryn» jobasynyń arnaıy júldesin Ózbekstannyń aqyny Qojamuratov Rınat, «Ózbekáli Jánibekov» atyndaǵy arnaıy júldeni Qazaq ulttyq óner ýnıversıtetiniń stýdenti Kádirbaı Batyrjan aldy.
Aıtys «Alataý» dástúrli óner teatrynyń qoldaýymen, «ASSYLTAS» qoǵamdyq qorynyń quryltaıshysy Dýlat Tastekeevtiń demeýshiligimen ótti. Eki kúndik sharaǵa: QR Eńbek sińirgen qaıratkeri, «Otan» ordeniniń ıegeri, «Aıtys aqyndary men jyrshy-termeshilerdiń Halyqaralyq odaǵy» RQB basqarma tóraǵasy Júrsin Erman, QR Parlamenti májilisiniń depýtaty, QR Eńbek sińirgen qaıratkeri, belgili aıtysker aqyn Amanjol Áltaev, QR Mádenıet qaıratkeri, belgili aıtysker aqyn Serik Qalıev, Altyn dombyra ıegeri, Aıtystyń aqtańgeri Erkebulan Qaınazarov, Fılologııa ǵylymdarynyń doktory, professor Baltabaı Ábdiǵazıuly qazylyq etti. Al sóz báıgesin aıtysker aqyn, O.Dosbosynov atyndaǵy aqyndar mektebiniń jetekshisi Shuǵaıyp Sezimhanuly júrgizdi.
