عىلىم جانە جوعارى ءبىلىم ءمينيسترى الماتىداعى جەر سىلكىنىسىنەن كەيىن قاي جوعارى وقۋ ورىندارىنا زاقىم كەلگەنىن ايتتى، دەپ حابارلايدى "ادىرنا" ءتىلشىسى
الماتىدا 4 ناۋرىز كۇنى قاتتى جەر سىلكىنىسى بولىپ، بىرنەشە وقۋ ورىندارىنىڭ قيراعانى تۋرالى اقپارات تاراعان بولاتىن.
مينيستر ساياسات نۇربەك قاتتى قيراۋدىڭ بولماعانىن، ءال-فارابي اتىنداعى قازاق ۇلتتىق ۋنيۆەرسيتەتى، اباي اتىنداعى قازۇپۋ، قازاق ۇلتتىق قىزدار پەداگوگيكالىق ۋنيۆەرسيتەتى جانە بىرنەشە جاتاقحانا عيماراتتارىندا جارىقتار پايدا بولعانىن مالىمدەدى.
ء"بىز سەيسميكالىق توزىمدىلىك بويىنشا قالا قۇرىلىسى بولىمدەرىنەن ارنايى مامانداردى شاقىرىپ، ساراپتاما جۇرگىزدىك. تىرەك قۇرىلىمدارىنا زاقىم كەلگەن جوق. جارىقتار بار، بىراق بۇل قاۋىپ تۋدىرادى دەپ ايتا المايمىز. بارلىق ستۋدەنت دەرەۋ شىعارىلدى. بىرنەشە پۋنكتە وتەتىن ۇبت توقتاتىلدى. ءبىز بارلىق ساباقتى توقتاتتىق", - دەدى مينيستر ءماجىلىس كۋلۋارىندا.
بەلگىلى بولعانداي جەر سىلكىنىسىنەن كەيىن پايدا بولعان جارىقتاردى جوندەۋ جۇمىستارىن ۋنيۆەرسيتەتتەر ءوز قاراجاتىنا جاساماق. مينيستر شىعىن كولەمى از ەكەنىن اتاپ ءوتتى.
