ۇلت ۇستازى احمەت بايتۇرسىنۇلىنىڭ كەسەك ەڭبەگىنىڭ كەي بەتتەرى تابىلدى، دەپ حابارلايدى "ادىرنا" ءتىلشىسى Egemen.kz-كە سىلتەپ.
الاش مۇراسىن دەن قويا زەرتتەپ جۇرگەن ازامات ادىلەت احمەتۇلى عالىمدار ىزدەپ جۇرگەن كىتاپتىڭ تولىق نۇسقاسى الىستا ەمەس، الماتىداعى قر ۇلتتىق كىتاپحاناسىنىڭ سيرەك كىتاپتار قورىندا ەكەنىن تاۋىپ، "ەگەمەن قازاقستانعا" كولەمدى ماقالا جازىپ، قازاق وقىرماندىرىنان ءشۇيىنشى سۇراعان.
1926 جىلى تاشكەنتتە جارىق كورگەن "ادەبيەت تانىتقىش" ەڭبەگى "ادەبيەت تەورياسى" اتالىپ تا كەتكەن.
قازاقتىڭ قايماقتى ءتىلىمەن قازىنالى دۇنيەتانىمىنا بەيىمدەلگەن بۇل كىتاپتىڭ سوڭعى بەتتەرى ءىزىم-قايىم جوعالعان بولاتىن.
ا.بايتۇرسىنۇلى مۋزەي-ءۇيىنىڭ جەتەكشىسى رايحان يماحانبەت «ادەبيەت تانىتقىشتىڭ» سوڭعى بىرنەشە بەتىنىڭ ۇشتى-كۇيلى جوعالعانىن، ءالى دە تابىلماي كەلە جاتقانىن بىرنەشە رەت جازعان بولاتىن.
الايدا اراعا ءبىراز جىل سالىپ ۇلت ۇستازىنىڭ جوعالعان مۇراسى تابىلعانى ايتىلدى. «ادەبيەت تانىتقىشىنىڭ» سوڭعى بەتتەرىنىڭ جىرتىلماعان نۇسقاسى قازاقستان رەسپۋبليكاسى ۇلتتىق كىتاپحاناسىنىڭ سيرەك كىتاپتار مەن قولجازبالار قورىندا بولىپ شىقتى.
كۇنى بۇگىنگە دەيىن «ادەبيەت تانىتقىشتىڭ» 1926 جىلى باسىلعان نۇسقانىڭ ءۇش داناسى عانا بەلگىلى ەكەن. ونىڭ ءبىرى – ۇلتتىق كىتاپحانانىڭ سيرەك كىتاپتار قورىنداعى 280-بەتتەن اياقتالاتىن نۇسقا. ال ەكىنشىسى – ورتالىق عىلىمي كىتاپحانانىڭ سيرەك كىتاپتار قورىنداعى 282-بەتتەن تۇراتىن نۇسقاسى بولسا، سوڭعىسى – عالىم ءادي ءشارىپوۆتىڭ جەكە قورىندا ساقتاعان نۇسقا.
