Ult ustazy Ahmet Baıtursynulynyń kesek eńbeginiń keı betteri tabyldy, dep habarlaıdy "Adyrna" tilshisi Egemen.kz-ke siltep.
Alash murasyn den qoıa zerttep júrgen azamat Ádilet Ahmetuly ǵalymdar izdep júrgen kitaptyń tolyq nusqasy alysta emes, Almatydaǵy QR Ulttyq kitaphanasynyń Sırek kitaptar qorynda ekenin taýyp, "Egemen Qazaqstanǵa" kólemdi maqala jazyp, qazaq oqyrmandyrynan shúıinshi suraǵan.
1926 jyly Tashkentte jaryq kórgen "Ádebıet tanytqysh" eńbegi "ádebıet teorııasy" atalyp ta ketken.
Qazaqtyń qaımaqty tilimen qazynaly dúnıetanymyna beıimdelgen bul kitaptyń sońǵy betteri izim-qaıym joǵalǵan bolatyn.
A.Baıtursynuly mýzeı-úıiniń jetekshisi Raıhan Imahanbet «Ádebıet tanytqyshtyń» sońǵy birneshe betiniń ushty-kúıli joǵalǵanyn, áli de tabylmaı kele jatqanyn birneshe ret jazǵan bolatyn.
Alaıda araǵa biraz jyl salyp ult ustazynyń joǵalǵan murasy tabylǵany aıtyldy. «Ádebıet tanytqyshynyń» sońǵy betteriniń jyrtylmaǵan nusqasy Qazaqstan Respýblıkasy Ulttyq kitaphanasynyń Sırek kitaptar men qoljazbalar qorynda bolyp shyqty.
Kúni búginge deıin «Ádebıet tanytqyshtyń» 1926 jyly basylǵan nusqanyń úsh danasy ǵana belgili eken. Onyń biri – Ulttyq kitaphananyń sırek kitaptar qoryndaǵy 280-betten aıaqtalatyn nusqa. Al ekinshisi – Ortalyq ǵylymı kitaphananyń Sırek kitaptar qoryndaǵy 282-betten turatyn nusqasy bolsa, sońǵysy – ǵalym Ádı Sháripovtiń jeke qorynda saqtaǵan nusqa.