سولتۇستىك قازاقستان وبلىسىنىڭ «ايىرتاۋ اۋداندىق اۋرۋحاناسى» 62 883 500 تەڭگەگە كومىر ساتىپ الماق، – دەپ حابارلايدى ادىرنا ۇلتتىق پورتالىنىڭ ءتىلشىسى satypalu.gov.kz/ سايتىنا سىلتەمە جاساپ.
قىلىشىن سۇيرەتكەن قىس ءبىتىپ، كۇلىمدەپ كوكتەم كەلىپ جاتقان شاقتا اۋداندىق اۋرۋحانا 15 500 توننا كومىردى نە ىستەمەك؟ بيۋدجەتتىڭ 62 883 500 تەڭگەسىنىڭ سۇراۋى جوق پا؟ بۇل سۇراقتارعا جاۋاپ تابۋ ءۇشىن تەندەر حابارلاماسىن زەرتتەپ كوردىك.
"سولتۇستىك قازاقستان وبلىسى اكىمدىگىنىڭ دەنساۋلىق ساقتاۋ باسقارماسى" كوممۋنالدىق مەملەكەتتىك مەكەمەسىنىڭ "ايىرتاۋ اۋداندىق اۋرۋحاناسى" شارۋاشىلىق جۇرگىزۋ قۇقىعىنداعى كوممۋنالدىق مەملەكەتتىك كاسىپورنى جاريالاعان مەملەكەتتىك ساتىپ الۋعا ءوتىنىم بەرۋ 19-ناۋرىز كۇنى باستالىپ، جەڭىمپاز 4-ءساۋىر كۇنى انىقتالادى ەكەن. اۋداندىق اۋرۋحانا «قىستىڭ قامىن جازدا ويلاپ»، جاز ەمەس، ءتىپتى كوكتەمدە ويلاپ، كەلەسى قىسقا دايىندىقتى باستاپ كەتىپتى.
مەملەكەتتىك ساتىپ الۋدىڭ جەڭىمپازى 15 500 توننا كومىردى ايىرتاۋ اۋدانىنا قاراستى اۋىلداردىڭ ەمحانالارىنا شىلدە، تامىز، قىركۇيەك ايلارى ىشىندە جەتكىزىپ بەرۋى كەرەك ەكەن.
ارينە، قىسى قىتىمىر سولتۇستىكتىڭ سۋىعىنا كۇمان كەلتىرە المايمىز! بىراق، بىرىنشىدەن شىلدەدە ساتىپ العان كومىر قازان ايىنا دەيىن ۇگىلىپ، ۋاتىلىپ كەتپەي مە؟ تەحنيكالىق سيپاتتامادا كورسەتىلگەن كومىردىڭ D سورتى (ۇزىن تاس) ىلعالدىلىعىن كۇز كەلگەنشە ايرىلىپ قالماي ما؟
ەكىنشىدەن، سولتۇستىكتەگى اۋداندىق اۋرۋحانا كەلەسى قىسقا دايىندىقتى نە سەبەپتى ەرتە باستاپ وتىر؟ اۋداندىق اۋرۋحانا تەندەردى اسىقپاي جاز اياقتالعان سوڭ جاريالاپ، كومىر كۇزدىڭ العاشقى ايلارىندا ساتىپ الۋعا بولماس پا ەدى؟
بۇل سۇراقتاردى ءتيىستى مەكەمەگە جولدادىق. ول جاقتان جەتكەن جاۋاپقا دا مىنبەر بەرۋگە دايىنبىز!
قانات بىرلىكۇلى
Adyrna.kz
