ەشكى ءسۇتى وندىرىلەتىن جەرگىلىكتى شارۋا قوجالىعىندا التى جاسار بالا رەزەرۆۋارعا باتىپ، قازا تاپتى، دەپ "ادىرنا" ءتىلشىسى Almaty.tv-عا سىلتەمە جاساپ حابارلايدى.
الماتى وبلىسى كەمەرتوعان اۋىلىندا كاسىپ نىسانى كارىز سۋىن اۋىلعا توگىپ، مالدىڭ ىشەك-قارنىن قالاي بولسا، سولاي تاستاي بەرگەن. اۋىل تۇرعىندارى كاسىپكەرگە نارازى.
"قورشاۋ سەنىمسىز بولعاندىقتان، بالا سوندا ءوتىپ، سۋعا باتىپ كەتكەن. ول جەردە ۇلكەن رەزەرۆۋارلار بار. بالا 6 جاستا ەدى، قايتىس بولدى.
تەرەزەنى اشساڭ ولىكتىڭ ءيىسى شىعادى. ءارتۇرلى اۋرۋ شىعادى. كوشىپ كەتە المايمىز، بەس بالامدى شىرىلداتىپ، قايدا بارامىن؟ مالدىڭ قي-تەزەگىنە باتىپ، كىشكەنتاي ءسابي قايتىس بولعان. بۇل كىسىلەر ولىكتەن دە قورىققان جوق", - دەدى كەمەرتوعان اۋىلىنىڭ تۇرعىنى جۇلدىز اكىمباەۆا.
بۇل ماسەلەدەن جەرگىلىكتى اكىمدىك تە حاباردار بولعان كورىنەدى. الايدا اكىمدىكتەگىلەردىڭ قۇرعاق ۋادەسىنەن شارشاعان حالىق "اۋرۋ بولامىز با" دەپ قورقاتىنىن ايتتى.
جۋرناليستەردىڭ تۇسىرگەن ۆيدەوسىندا قالدىق توگىلگەن شۇڭقىردىڭ اۋزى اشىق قالعان. بەتىندە قاۋىپسىزدىك قاقپاعى دا، ەسكەرتۋ بەلگىسى دە جوق. اكىمنىڭ ورىنباسارى ارىزدى قابىلدايتىنىن ايتتى.
ء"يا، سوتقا بەرىڭىزدەر. مەن سىزدەردى كوشىرىپ جىبەرە المايمىن. قالاي جەر ساتىپ العاندارىڭىزدى انىقتايىق. شىنى كەرەك، ءبىز شەشىم قابىلدامايمىز. اكىم جينالىستا. ەندى ءاربىر ادامنىڭ ارىزىن قابىلدايمىز", - دەدى ىرگەلى اۋىلدىق وكرۋگى اكىمىنىڭ ورىنباسارى اركەن كەنجەباي.
تۇرعىندار داۋلى ەشكى فەرماسىنا ارىز جازىپ، شۋ شىعارسا دا شارۋاشىلىق قوجايىنى قاراسىن كورسەتپەگەن.
ءتىپتى اتالعان مەكەمەگە تۇرعىنداردان 2021-2022 جىلدارى شاعىم ءتۇسىپ، سول بويىنشا تەكسەرىس تە جۇرگەنى حابارلاندى.
