قازاقستان پرەزيدەنتى قاسىم-جومارت توقاەۆ رەسەيدەگى تەراكتىگە بايلانىستى قاۋىپسىزدىك كەڭەسىنىڭ جەدەل وتىرىسىن وتكىزدى، دەپ حابارلايدى “ادىرنا” ۇلتتىق پورتالى اقوردانىڭ ءباسپاسوز قىزمەتىنە سىلتەپ.
«پرەزيدەنت قاسىم-جومارت توقاەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ شۇعىل وتىرىسى ءوتتى. مەملەكەت باسشىسى بەيبىت تۇرعىندارعا قاتىستى ماسكەۋ وبلىسىندا بولعان زورلىق-زومبىلىق ارەكەتتى تاعى دا ايىپتاي وتىرىپ، تەرروريزمگە قارسى كۇرەستە قازاقستاننىڭ رەسەيمەن بىرگە ەكەنىن راستادى»، - دەلىنگەن سەنبىدە جاريالانعان حابارلامادا.
جيىن بارىسىندا قۇقىق قورعاۋ قۇرىلىمدارى مەن جەرگىلىكتى اتقارۋشى ورگانداردىڭ جۇمىس جوسپارى، سونداي-اق ەكسترەمالدى جاعدايلارداعى ولاردىڭ قىزمەتىن ۇيلەستىرۋ ماسەلەلەرى قاراستىرىلدى.
“پرەزيدەنت ەل ازاماتتارىنىڭ قاۋىپسىزدىگىن جانە تەرروريزمگە قارسى كۇرەس ماقساتىندا قازاقستاننىڭ باسقا مەملەكەتتەرمەن جانە حالىقارالىق ۇيىمدارمەن ىقپالداستىعىن قامتاماسىز ەتۋگە باعىتتالعان بىرقاتار تاپسىرما بەردى” دەپ تولىقتىردى اقوردا.
