رەسەيلىك باق-تا تاراعان ماسكەۋدەگى لاڭكەستىك ارەكەتكە كۇدىكتى دەلىنگەن تاجىكستاندىق ءۇش ازاماتتىڭ قىلمىسقا قاتىسى جوق ەكەنى ايتىلدى، دەپ حابارلايدى “ادىرنا” ۇلتتىق پورتالى. بۇل تۋرالى تاجىكستاننىڭ ىشكى ىستەر مينيسترلىگى مالىمدەدى.
ۆەدومستۆونىڭ مالىمەتىنشە، رەسەيدە كۇدىكتى دەپ اتالعان ريۆودجيددين يسلوموۆ پەن ماحمادراسۋل ناسريددينوۆ «2023 جىلدىڭ 26 قاراشاسىندا رەسەي فەدەراتسياسىنان تاجىكستان رەسپۋبليكاسىنا كەلگەن جانە تۇرعىلىقتى مەكەن-جاي بويىنشا تۇرىپ جاتىر».
ۆەدومستۆو ولاردىڭ سۋرەتتەرىن دە جاريالادى.
تاعى ءبىر ازامات رۋستام نازاروۆ «قازىر سامارادا تاكسي جۇرگىزۋشىسى بولىپ جۇمىس ىستەيدى»، - دەپ ءتۇسىندىردى ىشكى ىستەر مينيسترلىگى.
ەستەرىڭىزگە سالا كەتەيىك، 22 ناۋرىز كۇنى كەشكە رەسەيدىڭ كروكۋس سيتي حوللىندا بەلگىسىز بىرەۋلەر ءىرى تەراكت جاساعان بولاتىن. الدىن الا مالىمەت بويىنشا، ونداعان ادام قازا تاۋىپ، 100-دەن استامى جارالانعان. كروكۋس سيتي حوللداعى تەراكتىگە بايلانىستى قازاقستان ازاماتتارى ءۇشىن سەنىم تەلەفونى اشىلدى. پرەزيدەنت قاسىم-جومارت توقاەۆ قازاقستان اتىنان ماسكەۋدەگى كروكۋس سيتي حوللداعى لاڭكەستىك ارەكەتتى قاتاڭ ايىپتادى. ايتا كەتەيىك، ۋكراينا لاڭكەستىك ارەكەتكە قاتىسى جوقتىعىن بىردەن ءمالىم ەتتى.
ال 7 ناۋرىزدا رەسەي فەدەرالدىق قاۋىپسىزدىك قىزمەتى "ماسكەۋدەگى سيناگوگاعا جاسالماق شابۋىلدىڭ الدىن الدىق" دەپ، ىقتيمال اتىستا قازاقستاننىڭ ەكى ازاماتى قازا تاپقانىن جاريالاعان. رەسەي جاعىنىڭ مالىمەتىنشە، «ۆيلايات حوراسان» توبىنىڭ (يسلام مەملەكەتىنىڭ اۋعانستاندىق تارماعى بولۋى مۇمكىن) مۇشەلەرى ماسكەۋدەگى سيناگوگاعا قارۋلى شابۋىلعا وقتالعان. ولار كالۋگا وبلىسىنداعى جەكە ۇيلەردىڭ بىرىنەن تابىلعان. تۇتقىنداۋ كەزىندە كۇدىكتىلەر «قارسىلىق كورسەتىپ» وق اتىلعان. سالدارىنان "لاڭكەستىك ارەكەتكە دايىندالدى" دەگەن ەكى كۇدىكتى – قازاقستان ازاماتتارى، 35 جاستاعى ءسابيت اشىراليەۆ پەن 32 جاستاعى جانىبەك تاسقۇليەۆ قازا تاپقان.
