بۇگىن كورنەكتى مەملەكەت جانە قوعام قايراتكەرى، گولوششەكينگە اشىق قارسى شىققان ساياساتكەر نىعمەت نۇرماقوۆتىڭ تۋعانىنا - 129 جىل.
نىعمەت نۇرماقوۆ - 1895 جىلى 25 ساۋىردە سەمەي وبلىسى قارقارالى ۋەزىندە دۇنيەگە كەلگەن.
1915 جىلى ومبى مۇعالىمدەر سەمينارياسىن، 1931 جىلى ۆكپ (ب) وك جانىنداعى كوممۋنيستىك ۋنيۆەرسيتەتتى ءتامامدادى.
1915—1918 جىلدارى قارقارالىدا مەكتەپ مۇعالىمى بولدى. 1918 جىلى اقپان-مامىر ايلارى — جۇمىسشى شارۋا دەپۋتاتتارى قارقارالى ۋەزدىك كەڭەسىنىڭ حاتشىسى بولىپ، 1918—1919 جج. اقگۆاردياشىلار تۇرمەسىندە وتىردى.
1920—1921 جج. — قارقارالى ۋەزدىك رەۆكومىنىڭ، ۋەزدىك اتقارۋ كوميتەتىنىڭ، سەمەي گۋبەرنيالىق اسكەري رەۆكومىنىڭ مۇشەسى جانە ءبولىم مەڭگەرۋشىسى، گۋبكومنىڭ ءبولىم مەڭگەرۋشىسى، سەمەي گۋبەرنيالىق اتقارۋ كوميتەتىنىڭ مۇشەسى قىزمەتىن اتقاردى.
1921 جىلدىڭ قازانىنان رەۆوليۋتسيالىق تريبۋنالدىڭ توراعاسى، 1923 جىلدىڭ 11 ساۋىرىنەن رسفسر جوعارعى سوتىنىڭ قازاق ءبولىمىنىڭ توراعاسى بولدى. ونىڭ جوعارعى سوت پەن گۋبەرنيالىق پروكۋراتۋرانىڭ قالىپتاسۋىنداعى ءرولى ەرەكشە زور.
1923—1924 جىلدارى يۋستيتسيا حالىق كوميسسارى بولدى. وسى كەزەڭدە پروكۋراتۋرا مەن سوت ورگاندارىن ۇيىمداستىرۋ، كاسىبي كادرلاردى دايارلاۋ، ءىس جۇرگىزۋگە قازاق ءتىلىن ەنگىزۋ جۇمىستارى اياقتالدى. ورىنبوردا تۇڭعىش ولكەلىك زاڭ كۋرسىنىڭ اشىلۋى نۇرماقوۆتىڭ قىزمەتكە كەلۋىمەن ءدال كەلدى. قىسقا مەرزىمدى كۋرستار سەمەيدە، اقمولادا، قوستانايدا اشىلدى. ولاردىڭ جانىنان ەڭبەك سەسسيالارى ۇيىمداستىرىلدى.
1922 جىلعى 13 شىلدەدە ەكىنشى شاقىرىلعان كيرتسيك-ءتىڭ ءىىى سەسسياسىندا پروكۋرورلىق قاداعالاۋ تۋرالى، ادۆوكاتۋرا تۋرالى ەرەجەلەر قابىلداندى. 1923 جىلعى 28 جەلتوقساندا كيرتسيك جانىنداعى باس تارتىپتىك كەڭەس تۋرالى قاۋلى بەكىتىلدى.
1925 جىلعى قىركۇيەك—قازان ايلارى — ۆكپ(ب) كيروبكومىنىڭ ءبولىم مەڭگەرۋشىسى، 1924 جىلعى قازان — 1929 جىلعى ءساۋىر — قاكسر حالىق كوميسسارلارى كەڭەسىنىڭ توراعاسى بولدى.
سونداي-اق، ن.نۇرماقوۆ ف.گولوششەكيننىڭ قازاق دالاسىندا «كىشى قازان توڭكەرىسىن» جاساۋ كەرەك دەگەن ارانداتۋشىلىق پىكىرىنە جانە حالىق مالىن تاركىلەۋگە باعىتتالعان شارالارىنا ءۇزىلدى-كەسىلدى قارسى بولىپ، وعان اشىق قارسى شىقتى. ف.گولوششەكينمەن اراداعى پىكىر قايشىلىعى ونىڭ ۇكىمەت باسشىسى قىزمەتىنەن بوساپ، ماسكەۋدەگى بك(ب)پ وك جانىنداعى جوعارى پارتيا مەكتەبىنە وقۋعا جىبەرىلۋىمەن اياقتالدى.
1931—1937 جج. — ۆتسيك حاتشىسىنىڭ ورىنباسارى، ۆتسيك پرەزيدۋمىنىڭ ءبولىم مەڭگەرۋشىسى ۆكپ(ب) قازاق ولكەلىك كوميتەتىنىڭ قاكسر واك مۇشەسى قىزمەتىن اتقاردى.
1937 جىلى اتىلىپ، 1956 جىلعى تامىزدا اقتالدى.
