سانالى عۇمىرىن تەاتر ونەرىنە ارناعان قازاقتان شىققان تۇڭعىش رەجيسسەر قىز عايني حايروللاقىزىنىڭ تۋعانىنا - 110 جىل تولدى، دەپ حابارلايدى "ادىرنا" ۇتتىق پورتالى.
عايني حايروللاقىزىنىڭ ەسىمى كەيبىر دەرەكتەردە «عاينيجامال» دەپ تە اتالادى. 1914 جىلى اتىراۋ وبلىسى، قۇرمانعازى اۋدانىندا (بۇرىنعى تەڭىز اۋدانى – اۆت.) دۇنيەگە كەلگەن. عاينيجامالدىڭ ونەر الەمىنە قادام باسۋىنا تۇرتكى بولعانى اكەسى حايروللانىڭ ۇلتتىق اسپابىمىز – دومبىرانىڭ قۇلاعىندا ويناۋى ەدى. اكەسىنىڭ قانىمەن دارىعان قاسيەت قارشاداي قازاق قىزىنىڭ رەسەيدەگى جوعارى وقۋ ورىندارىندا ءبىلىم الۋىنا جول اشتى.
العاشقى باسپالداعى لەنينگراد ونەر تەحنيكۋمىنداعى قازاق ستۋدياسىنان باستالادى. قازاق ستۋدياسىندا قىزمەت ەتەتىن «شىعىس ءۇيى» اتتى ۇيىمىندا ورتا ازيادان كەلگەن جاستار ونەر كورسەتىپ، سونىڭ ىشىندە عاينيجامالدىڭ ۇلتتىق اسپابىمىز – دومبىرانىڭ قۇلاعىندا ويناپ، حالىق كۇيلەرىنەن تارتۋ جاساۋى، سول ءبىر مەزەتتە كۋا بولعان جاستاردى ەلەڭ ەتكىزەدى.
1938 جىلى ديپلومدىق جۇمىسىن قورعاپ، ارمان ساپارىنا اتتانادى.1947 – 1949 جىلدارى جامبىل وبلىستىق قازاق دراما تەاترىنىڭ رەجيسسەرى قىزمەتىن اتقارادى. رەجيسسەرلىك ءبىلىمىن شىڭداۋ ماقساتىندا 1956 جىلى ءماسكەۋ قالاسىنداعى ونەر ينستيتۋتىنا وقۋعا تۇسەدى.
قازاقستاننىڭ حالىق ءارتىسى ايشا ابدۋللينا (1916 – 2019) 2017 جىلى 8 ناۋرىزدا، «Egemen Qazaqstan» گازەتىندە جارىق كورگەن «مەنىڭ باعىمدى اشقان – كۇلاش بايسەيىتوۆا» اتتى سۇحباتىندا: «حالىق ءارتىسى اتاعىن الۋىما قازاقتان شىققان العاشقى ايەل-رەجيسسەرلەردىڭ ءبىرى عاينيجامال حايرۋللينا قوماقتى ۇلەس قوستى. عاينيجامالدىڭ 1958 جىلى ازىرلەگەن ءتورت قويىلىمى ۇزدىك شىعىپ، ءماسكەۋدەگى ساحنا مايتالماندارى مويىندادى»، دەپ ءوز ەستەلىگىن ايتادى. ونەر زەرتتەۋشىسى بوريس ەرزاكوۆيچتىڭ «قازاق حالقىنىڭ عاشىقتىق ءاندەرى» اتتى انتولوگياسىندا (قۇراستىرعان ونەرتانۋ عىلىمىنىڭ كانديداتى ق.ءجۇزباسوۆ) عاينيجامالمەن ءجۇزدەسكەن ساتتەرىنەن ەپيزودتار ۇسىنادى.
عاينيجامال حايروللاقىزىنىڭ شىعارماشىلىعىنا اۋقىمدى تالداۋ تەاترتانۋشى، ونەرتانۋ عىلىمدارىنىڭ كانديداتى باقىت كاكيقىزى نۇرپەيىستىڭ «قازاق تەاتر رەجيسسۋراسىنىڭ قالىپتاسۋى مەن دامۋ كەزەڭى (1915-2005 جج.)» اتتى 520-بەتتەن تۇراتىن مونوگرافيادا جاسالعان.
عاينيجامال حايروللاقىزىنىڭ شىعارماشىلىعىنىڭ 1-كەزەڭى: 1938-1961 جىلداردى، 2-كەزەڭى: 1961 جىلدان ءومىرىنىڭ سوڭىنا دەيىنگى ۋاقىتتى قامتيدى. بالالار مەن جاسوسپىرىمدەر تەاترىندا، كەيىن الماتى مەملەكەتتىك ونەر ينستيتۋتىندا (قازىرگى قۇرمانعازى اتىنداعى ۇلتتىق كونسەرۆاتوريادا) ۇستازدىق قىزمەت اتقارادى. 1967 جىلى 53 جاسىندا كەنەتتەن دۇنيەدەن وزدى.
