الماتى قالاسىنىڭ پروكۋراتۋراسى قالا ورتالىعىنداعى ساياباقتى قايتاردى، دەپ حابارلايدى “ادىرنا” ۇلتتىق پورتالى.
قالا پروكۋراتۋراسىنىڭ مالىمەتىنشە، كوپقاباتتى تۇرعىن ءۇي سالۋ ءۇشىن زاڭدى تۇلعاعا 2,8 گەكتار جەر تەلىمىن زاڭسىز بەرۋ فاكتىسى انىقتالدى.
"تالداۋ كورسەتكەندەي، 2007 جىلى جەرگىلىكتى اتقارۋشى ورگان الماتى قالاسىنىڭ باس جوسپاردىڭ ەرەجەلەرىن جانە ەگجەي-تەگجەيلى جوسپارلاۋ جوباسىن ەلەمەي، زاڭدى تۇلعاعا ساياباق ايماعى قاراستىرىلعان ۋچاسكەگە جەكە مەنشىك قۇقىعىن بەرگەن. كەيىننەن بۇل جەر شامامەن 2,3 ميلليارد تەڭگە وتەماقى تولەنىپ، مەملەكەت مۇقتاجى ءۇشىن تاركىلەندى", - دەلىنگەن حابارلامادا.
ۋاكىلەتتى ورگان قاداعالاۋ اكتىسىن ورىنداۋ ءۇشىن الماتى قالاسى اكىمىنىڭ قاۋلىسىن جانە ودان كەيىنگى ازاماتتىق-قۇقىقتىق مامىلەلەردى زاڭسىز دەپ تانۋ تۋرالى تالاپ ارىز بەردى. 26 ناۋرىزدا اپەللياتسيالىق ساتىداعى سوت تالاپتاردى تولىق قاناعاتتاندىردى.
2007 جىلى الماتى اكىمى يمانعالي تاسماعامبەتوۆ بولاتىن.
