مەملەكەت باسشىسى قاسىم-جومارت توقاەۆ بواو ازيا فورۋمىنىڭ پلەنارلىق سەسسياسىندا ءسوز سويلەدى، دەپ حابارلايدى “ادىرنا” ۇلتتىق پورتالى.
قاسىم-جومارت توقاەۆ جىل سايىن قىتايدىڭ حاينان پروۆينتسياسىندا وتەتىن بواو ازيا فورۋمىنىڭ پلەنارلىق سەسسياسىنىڭ اشىلۋ راسىمىنە قاتىستى.
پرەزيدەنت اتالعان فورۋمدا قۇرمەتتى قوناق رەتىندە ءسوز سويلەدى.
ول جيىن قاتىسۋشىلارىنا ءىلتيپات بىلدىرە وتىرىپ، قۇبىلمالى گەوساياسي احۋال مەن ەكونوميكالىق قيىنشىلىقتىڭ سالدارىنان تۋىنداعان جاھاندىق تۇراقسىزدىق جاعدايىندا بۇل پلاتفورما ديالوگ پەن حالىقارالىق ىنتىماقتاستىق ورتالىعى رەتىندە ماڭىزدى ءرول اتقاراتىنىن اتاپ ءوتتى.
سونداي-اق، بىلتىر قازاقستان مەن قىتاي اراسىنداعى تاۋار اينالىمى تاريحي رەكوردتىق كورسەتكىشكە 41 ملرد اقش دوللارىنا جەتكەنىن ايتتى.
“قىتايدىڭ ايماقتاعى ساۋدا-ساتتىعى مەن سالعان ينۆەستيتسياسىنىڭ تەڭ جارتىسى قازاقستاننىڭ ۇلەسىنە تيەسىلى. بىلتىر قازاقستان مەن قىتاي اراسىنداعى تاۋار اينالىمى 41 ميلليارد اقش دوللارىن قۇرادى. بۇل – تاريحي رەكوردتىق كورسەتكىش. 2023 جىلى ەلدەرىمىز اراسىنداعى جۇك تاسىمالىنىڭ كولەمى 22 پايىزعا ارتىپ، شامامەن 30 ميلليون تونناعا جەتتى. وسىدان ون جىلدان استام ۋاقىت بۇرىن قحر توراعاسى سي تسزينپين قازاقستانعا جاساعان ساپارى كەزىندە ء"بىر بەلدەۋ، ءبىر جول" اۋقىمدى مەگاجوباسىن تانىستىرعان بولاتىن. اتالعان جوبا شىعىس پەن باتىس اراسىنداعى نەگىزگى كوپىر قىزمەتىن اتقارادى، ال قىتايدان ەۋروپاعا قۇرلىق جولىمەن تاسىمالداناتىن جۇكتىڭ 80 پايىزى قازاقستان اۋماعى ارقىلى وتەدى. بۇل ماڭىزدى ارتىقشىلىقتى ءبىز تولىققاندى پايدالانۋعا ءتيىسپىز”، – دەدى قاسىم-جومارت توقاەۆ.
پرەزيدەنت ءوز سوزىندە ەلىمىزدىڭ جاڭا ەكونوميكالىق باعىتىنا ايرىقشا نازار اۋداردى.
«بىلتىر ەلىمىزدىڭ ەكونوميكالىق ءوسىمى 5,1 پايىزدى قۇرادى. بۇل الەمدىك ەكونوميكانىڭ بولجامدى دامۋ قارقىنىنان شامامەن ەكى ەسە كوپ. ءبىز ورتامەرزىمدى پەرسپەكتيۆادا ەكونوميكانىڭ ءوسىمىن كەمىندە 6 پايىز دەڭگەيىندە ۇستاپ تۇرۋدى جانە 2029 جىلعا قاراي ونىڭ كولەمىن ەكى ەسە ۇلعايتۋدى جوسپارلاپ وتىرمىز. وسى ماقساتقا قول جەتكىزۋ ءۇشىن مەن جاڭا ەكونوميكالىق باعىتتى جاريالادىم. بۇل باستاما كۇشتى ءارى قارقىندى دامىعان مەملەكەت قۇرۋعا باعىتتالعان قۇرىلىمدىق رەفورمالاردى جۇزەگە اسىرۋدى كوزدەيدى. قازاقستانداعى اشىق ەسىك ساياساتى، مول رەسۋرستار جانە ليبەرالدى نارىقتىق رەفورمالار كوپتەگەن شەتەلدىك، سونىڭ ىشىندە قىتايلىق كومپانيالاردىڭ دا نازارىن اۋداردى. وسى ورايدا ءبىز ازيالىق سەرىكتەستەرىمىزدى ەكونوميكامىزعا ينۆەستيتسيا قۇيۋعا، ءوزارا ءتيىمدى ىنتىماقتاستىقتىڭ جاڭا باعىتتارىن قاراستىرۋعا شاقىرامىز”، – دەدى مەملەكەت باسشىسى.
