تايۆاننىڭ شىعىس جاعالاۋىندا بىرنەشە قاتتى جەر سىلكىنىسى بولدى. جەراستى دۇمپۋىنەن كەيبىر عيماراتتار قيراپ قالعان دەپ حابارلايدى "ادىرنا" پورتالى حالىقارالىق باق-قا سىلتەپ.
اقش گەولوگيالىق قىزمەتىنىڭ مالىمەتىنشە، جەر سىلكىنىسىنىڭ وشاعى تايۆاننىڭ حۋاليەن قالاسىنان وڭتۇستىككە قاراي 18 شاقىرىم جەردە ورنالاسقان. سەيسمولوگتاردىڭ ايتۋىنشا، بۇل تايۆاندا سوڭعى 25 جىلدا بولعان ەڭ كۇشتى جەر سىلكىنىسى.
جاپونيانىڭ باس مەتەورولوگيالىق اگەنتتىگىنىڭ مالىمەتىنشە، ماگنيتۋداسى 7,5 بولاتىن ءبىرىنشى جەر سىلكىنىسى 3 ءساۋىر كۇنى، استانا ۋاقىتىمەن تاڭعى 04:58-دە تايۆاننىڭ شىعىس جاعالاۋىندا تىركەلگەن. جەر سىلكىنىسىنىڭ تەرەڭدىگى ءالى انىقتالعان جوق، تەك ونىڭ سۋ استىندا «وتە تاياز تەرەڭدىكتە» بولعانى انىقتالدى.
ارادا 15 مينۋت وتپەي – 5 ساعات 11 مينۋتتا – سول جەردە ماگنيتۋداسى 6,6 بولاتىن جەر سىلكىنىسى بولدى. جەر سىلكىنىسىنىڭ تەرەڭدىگى تاعى دا «وتە تاياز» ەكەنى انىقتالدى.
وسى ايماقتا تاڭعى ساعات 5:35-تە ماگنيتۋداسى 6,3 بولاتىن ءۇشىنشى جەر سىلكىنىسى تىركەلدى. جەر سىلكىنىسىنىڭ وشاعى سۋ استىندا 20 شاقىرىم تەرەڭدىكتە ورنالاسقان.
باسىلىم جەر سىلكىنىسىنىڭ جاپونيانىڭ وڭتۇستىگىندەگى وكيناۆا پرەفەكتۋراسىندا دا سەزىلگەنىن جازادى. جەر سىلكىنىسىنەن كەيىن وكيناۆا، مياكو جانە ياەياما ارالدارى توبىنا تسۋنامي قاۋپى ءتوندى. جاپون ماماندارى تولقىننىڭ بيىكتىگى ءۇش مەترگە جەتۋى مۇمكىن ەكەنىن جوققا شىعارمايدى.
الەۋمەتتىك جەلىلەردە توتەنشە جاعداي ورىن العان ۆيدەولار پايدا بولدى. كادرلاردا بۇلىنگەن عيماراتتار، سونداي-اق جەر استى دۇمپۋلەرىنىڭ ءساتى تۇسىرىلگەن.
ازىرگە قازا تاپقاندار مەن زارداپ شەككەندەر تۋرالى مالىمەت جوق.
