شىمكەنتتەگى كوشەلەردىڭ بىرىندە ەر ادام بەيتانىس ايەلدى سەبەپسىز تەپكىلەپ، بەتىنەن جۇدىرىقپەن ۇرعان، - دەپ حابارلايدى "ادىرنا" ۇلتتىق پورتالى. اتالمىش جايت بەينەباقىلاۋ كامەراسىنا ءتۇسىپ قالعان.
تولىق مالىمەتتى شابۋىل قۇربانى بولعان شىمكەنت قالاسىنىڭ تۇرعىنى ايتتى. ايتۋىنشا، اعىمداعى جىلدىڭ 13 اقپانىندا ول دوسىنىڭ تۋعان كۇنىنە بارا جاتقان. ول گۇل دۇكەنىنە سوعىپ، گۇلدەر ساتىپ الدى. تاكسي شاقىرۋ ءۇشىن دۇكەننىڭ سىرتىندا تۇرعان.
"ارتىما قاراسام، تەمىر جاقتاۋعا سۇيەنىپ قۇلاپ بارا جاتقان ەر ادامدى كوردىم. نەگە ەكەنى بەلگىسىز، مەن قاتىپ تۇرىپ قالدىم، ەشتەڭە ايتپادىم، بايقاۋسىزدا ماعان ءتيىپ كەتتى دەپ ويلادىم. بىراق ول تۇرىپ، باسىمنان قاتتى ۇردى. مەن نە بولىپ جاتقانىن ۇقپادىم. مەنىڭ ءتىپتى كوزىلدىرىگىم ۇشىپ كەتتى دە، ول ماعان سونداي قورقىنىشتى كوزدەرىمەن قارادى»، - دەپ جازدى ايەل.
بىراق ەڭ سوراقىسى، شىمكەنتتىك ءبىر تۇرعىننىڭ ايتۋىنشا، جولدان ءوتىپ بارا جاتقاندار كومەك سۇراعان داۋىسقا ءمان بەرمەگەن.
«مەن وزىمە كەلىپ: «پوليتسيا، كومەكتەس» دەپ ايقايلاي باستادىم. مەن دۇكەنگە قاراي جۇگىرىپ، پوليتسيا شاقىردىم. جانىمنان ادامدار، ايەلدەر مەن ەر ادامدار ءوتتى. ولاردىڭ كوزىنشە مەن جوق سياقتىمىن. قالتىراعانىم سونشا، مەن جىلاپ جىبەردىم، ەسەڭگىرەپ قالدىم. اينالامداعىلار: «وعان نە ايتتىڭ؟» دەگەن سۇراقتار قويا بەردى. ۋچاسكەلىك پوليتسيا قىزمەتكەرلەرى دە سول سۇراقتى قويدى، نەگە ەكەنى بەلگىسىز، تەرگەۋشى مەن كريمينولوگتار دا سولاي سۇراي بەردى. ماعان شابۋىل جاساعان ادام دا مەنى تاۋىپ الىپ، پوليتسيانىڭ كوزىنشە ولتىرەمىن دەپ ايعايلادى»، - دەپ ەسىنە الدى جابىرلەنۋشى ايەل.
كەيىن بەلگىلى بولعانداي، وعان 50 جاستاعى ەر ادام شابۋىل جاساعان. بويجەتكەننىڭ ايتۋىنشا، باسىنان العان سوققىنىڭ سالدارىنان ميى شايقالىپ، بەلى اۋىرىپ، تەرەڭ پسيحولوگيالىق جاراقات العان.
شىمكەنت قالالىق سوتىندا حابارلانعانداي، «بۇزاقىلىق جاساعانى ءۇشىن» 50 جاستاعى ەر ادام قاماۋعا الىندى.
«سوتتالۋشى و. 13 اقپان 2024 جىلى ساعات 18:00 شاماسىندا شىمكەنت قالاسى ءنۇرسات تۇرعىن الابىنىڭ №1 عيماراتىنىڭ جانىندا ورنالاسقان «ءنۇرسات-2» دۇكەنىنىڭ الدىندا ماس كۇيىندە جابىرلەنۋشىنى تەپكىلەگەن. سوتتالۋشى و. ايەلدىڭ ارقاسىنان سەبەپسىز ۇرىپ، ودان كەيىن «بەت تۇسىنان جۇدىرىقپەن ۇرىپ، دەنساۋلىعىنا جەڭىل زيان كەلتىرگەن. سوتتالۋشىنىڭ كىناسى جابىرلەنۋشىنىڭ ايعاقتارىمەن، زاتتاي دالەلدەمەلەرىمەن، سوت-مەديتسينالىق ساراپتاماسىنىڭ قورىتىندىسىمەن، جانە ءىس بويىنشا جينالعان باسقا دا دەرەكتەرمەن دالەلدەندى»، - دەپ حابارلادى شىمكەنت سوتى.
سوت ۇكىمىمەن ەر ادام بۇزاقىلىق جاساعانى ءۇشىن كىنالى دەپ تانىلىپ، 1 جىلعا باس بوستاندىعىن شەكتەۋ جازاسىنا كەسىلدى.
«جازانى تاعايىنداۋ كەزىندە سوت مىنالاردى ەسكەردى: ونشا اۋىر ەمەس قىلمىستىق قۇقىق بۇزۋشىلىق جاساۋ، كىناسىن مويىنداۋ جانە شىن جۇرەكتەن وكىنۋ تۇرىندەگى جاۋاپتىلىقتى جەڭىلدەتەتىن ءمان-جايلاردىڭ بولۋى، سونداي-اق سوتتالۋشىنىڭ 3-ءشى توپتاعى مۇگەدەكتىگىنىڭ بولۋى، - دەپ حابارلادى شىمكەنت سوتىنان.
سوتتىڭ ۇكىمى زاڭدى كۇشىنە ەنگەن جوق.
