قىرعىزستان قازاقستانعا 270 توننا گۋمانيتارلىق كومەك تيەلگەن جۇك كولىكتەرىن جونەلتتى، دەپ حابارلايدى "ادىرنا" ۇلتتىق پورتالى توتەنشە جاعدايلار مينيسترلىگىنىڭ ءباسپاسوز قىزمەتىنە سىلتەپ.
«بۇگىن تاڭەرتەڭ گۋمانيتارلىق جۇك تيەلگەن اۆتوكولوننا قازاقستانعا جول تارتتى»، - دەپ حابارلادى ءباسپاسوز قىزمەتى.
مۇنداي تاپسىرمانى قىرعىزستاننىڭ توتەنشە جاعدايلار مينيسترلىگىنە پرەزيدەنت سادىر جاپاروۆ بەرگەن.
«ازىق-تۇلىك كەرۋەنىندە» قازاقستاندىقتارعا ارنالعان سۇيىق ماي، قانت، كۇرىش، ماكارون مەن كونديتەرلىك ونىمدەرى جانە قىرعىزستاندا جاسالعان ماتراتستار مەن پالاتكالار بار. گۋمانيتارلىق كومەكتىڭ قۇنى – 40 ميلليون قىرعىز سومى. سىرتىنا «قىرعىز ەلىنەن باۋىرلاس قازاق ەلىنە جاردەم» دەپ جازىلعان جۇك تيەگەن ونداعان كولىك قىرعىزستاننان 6-ءساۋىر كۇنى تاڭعى 4:00 دە اتتانعان.
ايتا كەتەيىك، ەلدەگى سۋ تاسقىنى سالدارى ءالى دە سەيىلەر ەمەس. ايماقتار تاسقىن سۋدىڭ استىندا قالىپ، توعىز وبلىستا (اباي، اقمولا، اقتوبە، اتىراۋ، باتىس قازاقستان، قاراعاندى، قوستاناي، پاۆلودار، ۇلىتاۋ) جەرگىلىكتى توتەنشە جاعداي رەجيمى جاريالاندى. پرەزيدەنت قاسىم-جومارت توقاەۆ تابيعي اپاتقا قاتىستى قازاقستاندىقتارعا ۇندەۋ جولدادى.
