8 ءساۋىر كۇنى الەۋمەتتىك جەلىلەردە اتىراۋ قالاسى اكىمدىگىنىڭ قىزمەتكەرى ا.يبراگيموۆ «Toyota»تسەنتر اۆتوسالونىندا جۇمىس ۋاقىتىندا كولىك قاراپ جۇرگەنىنە قاتىستى بەينەجازباسى تارالدى. اتىراۋ قالاسىنىڭ اكىمدىگىنىڭ ءباسپاسوز حاتشىسى قىزمەتكەر تۋرالى مالىمدەمە بەردى، دەپ حابارلايدى “ادىرنا” ۇلتتىق پورتالى.
«تابيعي جانە تەحنوگەندىك سيپاتتاعى توتەنشە جاعدايعا بايلانىستى جۇرگىزىلىپ جاتقان جۇمىستار بارىسىندا ا.يبراگيموۆ قالا اكىمى اپپاراتى ءىس باسقارماسىنىڭ تەڭگەرىمىندەگى «Toyota» اۆتوكولىكتەرىن جوندەۋگە قويۋ ءۇشىن قوسالقى بولشەكتەردى قاراپ جۇرگەن ۋاقىتىندا بلوگەر ر.بايازيەۆ قۋىپ جەتىپ، بەينەجازباعا تۇسىرگەن.
ءوز كەزەگىندە ايتا كەتۋ قاجەت، ا. يبراگيموۆ 2024 جىلدىڭ قاڭتارىنان باستاپ اتىراۋ قالالىق تۇرعىن ءۇي كوممۋنالدىق شارۋاشىلىعى جانە تۇرعىن ءۇي ينسپەكتسياسى ءبولىمىنىڭ اباتتاندىرۋ جانە كوگالداندىرۋ سەكتورىنىڭ باس مامانى لاۋازىمىندا جۇمىس جاسايدى”، دەلىنگەن حابارلامادا.
سونداي-اق، اكىمدىك اتالعان بلوگەر اقپاراتتى بۇرمالاۋ ارقىلى پروۆوكاتسيا جاساعانىن ايتتى.
“تابيعي سيپاتتاعى توتەنشە جاعداي كەزىندە وزدەرىن قوعام بەلسەندىسى ساناپ جۇرگەن ازاماتتاردىڭ مەملەكەتتىك قىزمەتشىلەردى ءارتۇرلى ارانداتۋ ارقىلى اقپاراتتى ءوز پايداسىنا بۇرمالاپ بەرۋ ارەكەتتەرىن قۇپ كورمەيتىنىمىزدى جەتكىزەمىز», - دەپ پىكىر ءبىلدىردى اكىمدىكتەگىلەر.
