«تازا قازاقستان» اۋقىمدى اكتسياسى جامبىل وبلىسىندا «تازا اۋلا. تازا ولكە. تازا ەل!» باستاماسى اياسىندا وتەدى.
ەلىمىزدە 8 ساۋىردەن باستاپ «تازا قازاقستان» اۋقىمدى اكتسياسى باستالدى. جامبىل وبلىسىنىڭ تۇرعىندارى دا بۇل باستامانى بەلسەندى قولداۋدا. اكتسيا اياسىندا تاراز قالاسى مەن ءوڭىردىڭ بارلىق اۋدانىندا 5 اپتا بويى ەكولوگيالىق ءىس-شارالار وتكىزۋ جوسپارلانۋدا. ولاردىڭ ارقايسىسى بەلگىلى ءبىر تاقىرىپقا باعىتتالعان.
«تازا ولكە». ءبىرىنشى اپتادا ەلدى مەكەندەردىڭ تۇرعىندارى، قوعام قايراتكەرلەرى، ۇيىمداردىڭ قىزمەتكەرلەرى ءوز اۋماعىنداعى اۋلالاردى تازالايدى.
«كيەلى مەكەن». ەكىنشى اپتا تاريحي-مادەني ەسكەرتكىشتەردىڭ اۋماعىن اباتتاندىرۋعا ارنالادى.
«جاسىل ايماق». ءۇشىنشى اپتادا كوشەت وتىرعىزۋ، اعاشتاردى اكتەۋ جۇمىستارى جۇرگىزىلەدى.
«ونەگەلى ۇرپاق». اكتسيانىڭ ءتورتىنشى اپتاسىندا ارداگەرلەردىڭ اۋلالارى مەن قارتتار ءۇيىنىڭ اۋماعىن تازالاۋ، اباتتاندىرۋ كوزدەلەدى.
«ءمولدىر بۇلاق». اكتسيانىڭ قورىتىندى، بەسىنشى اپتاسىندا وزەندەر مەن كولدەر قوقىستان تازارتىلادى.
سونداي-اق ەكولوگيالىق ناۋقان اياسىندا تاراز قالاسىنداعى ى. دۇكەنۇلى اتىنداعى مادەنيەت ءۇيىنىڭ اۋماعىندا اعاش وتىرعىزۋ اكتسياسى وتەدى. وبلىس ورتالىعىندا جانە جۋالى اۋدانىندا «تازا اۋلا، تازا كوشە» بايقاۋى وتەدى.
شۋ تۇرعىندارى سەنبىلىكتى تەمىرجولشىلار ساياباعىندا وتكىزەدى. سارىسۋ اۋدانىندا بەلسەندى ازاماتتار سەنبىلىككە ورتالىق الاڭدا جانە كومسومول كولىنىڭ جاعاسىندا جينالادى.
شارا بارىسىندا وڭىردەگى ارىقتار مەن كانالداردى تازالاۋ، اباتتاندىرۋعا باسا نازار اۋدارىلادى.
«تازا قازاقستان» اكتسياسىنا «جاس ۇلان» جانە «جاسىل ەل» جاساقتارى دا بەلسەنە اتسالىسپاق.
