تۇرىكمەنستاننىڭ بەلگىلى ساياسي تۇتقىنى گۇلگەلدى اننانيازوۆ 16 جىلدان كەيىن بوستاندىققا شىقتى، دەپ حابارلايدى «ادىرنا» ءتىلشىسى fergana.agency-گە سىلتەمە جاساپ.
ول 1995 جىلى 12 شىلدەدە اشحابادتا ۇكىمەتكە قارسى دەمونستراتسيانىڭ سەگىز ۇيىمداستىرۋشىسىنىڭ ءبىرى بولدى. ميتينگتى پوليتسيا كۇش قولدانىپ تاراتىپ، اننانيازوۆ پەن باسقا قاتىسۋشىلار 15 جىلعا دەيىن باس بوستاندىعىنان ايىرىلدى. 1999 جىلى حالىقارالىق قۇقىق قورعاۋ ۇيىمدارىنىڭ قولداۋىمەن اننانيازوۆقا راقىمشىلىق جاسالدى. ناتيجەسىندە ول تۇرىكمەنستان اۋماعىنان كەتپەۋ شارتىمەن بوساتىلعان ەدى.
2002 جىلى ديسسيدەنت قازاقستانعا قاشىپ كەتتى. كەيىن 1 قىركۇيەكتە رەسەيگە كوشىپ، ەلدەن باسپانا سۇرادى. الايدا رەسەي بيلىگى اننانيازوۆتى جالعان تولقۇجاتپەن كەلۋىنە بايلانىستى قازاقستانعا قايتارىپ جىبەردى. تۇرىكمەنستاننىڭ سول كەزدەگى پرەزيدەنتى ساپارمۇرات نيازوۆ ديسسيدەنتتى ەكستراديتسيالاۋدى تالاپ ەتكەنىمەن، قازاقستان بيلىگى ونى باتىسقا جىبەردى.
وسىلايشا اننانيازوۆ نورۆەگيادان ساياسي باسپانا الدى.
2008 جىلى اننانيازوۆ تۇرىكمەنستاننىڭ جاڭا پرەزيدەنتى گۋربانگۋلى بەردىمۇحامەدوۆتىڭ ليبەرالدىق رەفورمالارىنا سەنىم ارتىپ، وتانىنا ورالادى. الايدا ديسسيدەنت ەلگە ورالۋ ءۇشىن تۇرىكمەنستان بيلىگىنەن رەسمي رۇقسات الماي، ءوز ەلىنە زاڭسىز كىرگەنى ءۇشىن 11 جىلعا سوتتالدى.
2019 جىلدىڭ ناۋرىزىندا اننانيازوۆقا تاعايىندالعان تۇرمە جازاسى اياقتالدى، بىراق سوت بەلسەندىنى گارابوگازداعى كولونيادا بەس جىلعا باس بوستاندىعىنان ايىردى. الايدا ءىستىڭ ءمان-جايى تۇسىندىرىلمەدى.
