مادەنيەت جانە اقپارات ءمينيسترى ايدا بالاەۆا سۋ تاسقىنىنا قاتىستى جالعان اقپارات تاراتقاندار تۋرالى ايتتى، دەپ حابارلايدى “ادىرنا” ۇلتتىق پورتالى.
“قازىر ەلىمىزدەگى سۋ تاسقىنىمەن كۇرەس قارقىندى ءجۇرىپ جاتىر جانە ونىڭ قاۋپى ءالى باسەڭدەگەن جوق. قارعىن سۋمەن كۇرەسكە قولداعى بارلىق كۇش پەن رەزەرۆ، ادام رەسۋرسى مەن قاجەتتى تەحنيكالار تۇگەل جۇمىلدىرىلدى. سۋ باسقان وڭىرلەردىڭ تۇرعىندارى، ولارمەن بىرگە جيىرما مىڭنان استام ۆولونتەر مەملەكەتتىك ورگاندارمەن بىرىگىپ جۇمىس جاساۋدا. وتانداستارىمىز اۋىزبىرلىك پەن جاناشىرلىق تانىتىپ، جۇدىرىقتاي جۇمىلىپ جاتىر. ءوز كاسىبىنە ادال توتەنشە جاعداي قىزمەتكەرلەرى، اسكەري قىزمەتشىلەر، ىشكى ىستەر قىزمەتكەرلەرى مەن مەملەكەتتىك قىزمەتشىلەر تاۋلىك بويى جۇمىس ىستەۋدە. قازىر ءاربىر ادام، ءاربىر تەحنيكا مەن ەڭبەك كۇشى وتە ماڭىزدى. كوپ رەسۋرستى قاجەت ەتەتىن وسى ءبىر قيىن ساتتە ءبىز اقپارات تاراتۋدا ءدال وسىنداي جۇيەلى تۇردە قيمىلداپ، ۇلكەن جاۋاپكەرشىلىك تانىتۋىمىز قاجەت”، - دەدى مينيستر.
ونىڭ ايتۋىنشا، اپاتتار مەن سۋ تاسقىنى تۋرالى جالعان حابارلارعا بايلانىستى قۇتقارۋ بريگادالارىنىڭ جۇمىس كۇشى قاجەت ەمەس جەرلەرگە باعىتتالعان جاعدايلار دا بولدى. سالدارىنان ەڭ قاجەتتى ۋاقىت تەككە كەتتى، رەسۋرستار پايداسىز شىعىن بولدى.
“اقپارات سالاسىنا جۇرگىزىلگەن مونيتورينگ بارىسىندا ءبىز جالعان اقپارات بولىپ شىققان 29 فاكتىنى انىقتادىق. ول حابارلامالاردىڭ بارلىعى ءتيىستى تەكسەرۋدەن كەيىن ۋاكىلەتتى ورگاندار تاراپىنان شىنايى ەمەس ەكەنى انىقتالدى. جالعان اقپاراتتار كوبىنە مەسسەندجەرلەر ارقىلى تارالادى. ەڭ كوپ تاراعان اقپاراتتار قاتارىنا بوگەتتەردىڭ بۇزىلۋى، رەسپۋبليكالىق ماڭىزى بار جولداردى سۋ باسۋى، سۋ قويمالارىنداعى، ەلەكتر ستانتسيالارىنداعى جانە باسقا دا ستراتەگيالىق وبەكتىلەردەگى اپاتتار، اۋىز سۋدىڭ لاستانۋى، ەۆاكۋاتسيالاۋ ورىندارى، قاراجات جيناۋ جانە تولەۋ تۋرالى جالعان مالىمەتتەر جاتادى. ماسەلەن، اقتوبەدەگى سۋ قويماسى شليۋزدەرىن اشۋ تۋرالى الەۋمەتتىك جەلىدە جالعان اقپارات تارادى. ونى كەيىن اقتوبە وبلىسىنىڭ اكىمدىگى جوققا شىعاردى”، - دەدى ول.
ءمينيستردىڭ مالىمەتىنشە، قوستاناي وبلىسىنىڭ اكىمدىگى ب.مايلين اۋدانىنداعى ايات وزەنى ارقىلى وتەتىن كوپىردىڭ ءبىر بولىگىنىڭ قۇلاۋى، سونداي-اق وڭىردەگى مال قورىمدارىن سۋ باسقانى تۋرالى حابارلامانى رەسمي تۇردە تەرىستەدى.
“وسى فاكتىلەر بويىنشا توتەنشە جاعداي قىزمەتكەرلەرى سول جەرلەرگە ارنايى بارعانىمەن، اقپاراتتىڭ راستالماعانىن ەرەكشە اتاپ وتكىم كەلەدى. باسقا جەرلەردەگى شىن كومەككە مۇقتاج جاندار كۇتىپ وتىراتىنىن، ولاردىڭ اراسىندا بالالاردىڭ بار بولۋى مۇمكىن ەكەنىن ۇمىتپايىق. دەنساۋلىق ساقتاۋ مينيسترلىگى دە سۋ باسقان اۋماقتاردا جۇقپالى اۋرۋلاردىڭ ءورشۋ قاۋپى جانە ەپيدەميولوگيالىق قىزمەت تاراپىنان جاعدايدى باقىلاۋدىڭ جەتكىلىكسىزدىگى تۋرالى جالعان اقپارات تاراعانىن مالىمدەپ وتىر. تاسقىننان زارداپ شەككەندەرگە ارنالعان تولەمدەر تۋرالى دا ادەيى جالعان حابارلامالار تاراتۋ ۇلكەن قاۋىپ توندىرەدى. سوڭعى كۇندەرى سۋ تاسقىنىنان زارداپ شەككەندەرگە مەملەكەت باسشىسى تاراپىنان ۋادە ەتىلەدى دەگەن ميلليونداعان دوللار تولەمدەرى، پرەمەر-مينيستر مەن ۇكىمەت مۇشەلەرىنىڭ اتىنان اقشالاي قاراجات جيناۋ تۋرالى جالعان حابارلامالار پايدا بولدى. مۇنداي اقپاراتقا سەنبەۋگە شاقىرامىن. الاياقتار سۋ تاسقىنى جاعدايىن وزدەرىنىڭ جەكە ماقساتىنا پايدالانا باستادى. تەرىس نيەتتىلەر قازاقستاندىقتاردىڭ جەكە دەرەكتەرى مەن قارجىلىق رەسۋرستارىن ۇرلاۋ ءۇشىن ينتەرنەتتە «تولەمدەر ءۇشىن جسن-ءدى تەكسەرىڭىز»، «3 ميلليون تەڭگەگە دەيىن وتەماقى الۋ»، «مەملەكەتتەن مۇمكىندىگىنشە تەزىرەك جاردەماقى الۋ» دەگەن سياقتى حابارلامالار جاريالايدى”، - دەدى بالاەۆا.
ونىڭ ايتۋىنشا، جارنامالارىن سەنىمدى كورسەتۋ ءۇشىن قىلمىسكەرلەر قازاقستاندىق بانكتەر مەن مەملەكەتتىك مەكەمەلەردىڭ اتاۋىن پايدالانادى. مىسالى، Facebook, Instagram جانە Telegram جەلىلەرىندە ەڭبەك جانە حالىقتى الەۋمەتتىك قورعاۋ مينيسترلىگىنىڭ ءارتۇرلى بانكتەرمەن بىرلەسىپ تولەيتىن تولەمدەرى تۋرالى حابارلامالار ءجيى جاريالانادى.
سونداي-اق، قارجى مينيسترلىگى جاڭا قاۋلى قابىلداپ، شىعىننىڭ ورنىن تولتىرىپ جاتىر ەكەن دەگەن جالعان اقپارات ءجۇر. ادامداردى جاڭىلىستىرۋ ءۇشىن الاياقتار ءار جازبانىڭ استىنا العىس سوزدەرى بار بوت پىكىرلەرىن جازادى.
“بۇل كورىنەۋ جالعان حابارلامالاردىڭ بارلىعى مەملەكەتتىك ورگاندار ارقىلى جەدەل تەرىسكە شىعارىلىپ، بارلىق فاكتىلەر بويىنشا قۇقىق قورعاۋ ورگاندارىنا حابارلامالار جىبەرىلدى. بارلىق انىقتالعان زاڭسىز فاكتىلەرگە قۇقىقتىق باعا بەرۋ، جەدەل-ىزدەستىرۋ جانە ءىس جۇرگىزۋ ءۇشىن ماتەريالدار قۇقىق قورعاۋ ورگاندارىنا جولداندى. سوندىقتان تەك رەسمي جانە راستالعان اقپاراتقا سەنىڭىزدەر. بارلىق كۇماندى فاكتىلەردى بىرنەشە رەت تەكسەرىڭىز جانە كۇماندى حابارلامالاردى ارى قاراي تاراتپاڭىز! ەسىڭىزدە بولسىن، بارلىق جالعان حابارلامالاردىڭ ماقساتى - ۇرەي تۋدىرۋ، حالىقتى جىككە ءبولۋ، مەملەكەتتىك قىزمەتتەر مەن ۆولونتەرلەردىڭ كەلىسىلگەن جۇمىسىن ۇيىمداستىرۋدى بۇزۋ جانە قاراپايىم حالىقتىڭ قايعى-قاسىرەتىن پايدالانىپ تەز پايدا تابۋ. سونداي-اق سۋ تاسقىنى مەن بۇزىلعان وڭىرلەردى قالپىنا كەلتىرۋ شارالارىن وبەكتيۆتى تۇردە جاريالاپ جۇرگەن باق وكىلدەرىنە ارنايى العىسىمدى بىلدىرگىم كەلەدى”، - دەپ ەسكەرتتى مينيستر.
