فوتو: Kazinform
پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا بۇگىن، 23 تامىزدا استاناداعى ۇلتتىق اكادەميالىق كىتاپحانادا ورنالاسقان №129 سايلاۋ ۋچاسكەسىندە قۇرىلتاي سايلاۋىندا داۋىس بەردى، دەپ حابارلايدى "ادىرنا".
ايدا بالاەۆانىڭ ايتۋىنشا، قازاقستاندىقتار دا سايلاۋعا بەلسەندى قاتىسىپ جاتىر. بۇل تاڭەرتەڭنەن بەرى جۇرگىزىلىپ جاتقان مونيتورينگ بارىسىندا الەۋمەتتىك جەلىلەردەن دە بايقالادى.
"جالپى، اقپاراتتىق كەڭىستىكتە جوعارى بەلسەندىلىكتى كورىپ وتىرمىز. استانادا كۇن رايىنىڭ جاڭبىرلى بولعانىنا قاراماستان، سايلاۋشىلار بەلسەندىلىك تانىتۋدا. بۇل ءاربىر ازاماتتىڭ ءوزىنىڭ جانە ەلىمىزدىڭ بولاشاعىنا ۇلكەن جاۋاپكەرشىلىكپەن قارايتىنىن كورسەتەدى. جالپى، ءبىز – باقىتتى حالىقپىز، ويتكەنى ءوز بولاشاعىمىزدى ايقىنداۋعا مۇمكىندىگىمىز بار. حالىقتىق كونستيتۋتسيا ءۇشىن داۋىس بەرگەن رەفەرەندۋم كەزىندە دە وسىنداي احۋالدى كوردىك. ءبىز بولاشاققا كوز تىگەمىز، قۇندىلىقتارىمىز بەن باسىمدىقتارىمىزدى بىلەمىز", – دەدى ايدا بالاەۆا.
ونىڭ ايتۋىنشا، مۇنداي مۇمكىندىك قازاقستاندىقتاردىڭ بىرلىگى مەن ىنتىماعىنىڭ ارقاسىندا قالىپتاستى. سوندىقتان ەلدەگى تۇراقتىلىقتى باعالاپ، ونى ساقتاۋ اسا ماڭىزدى.
سونىمەن قاتار ايدا بالاەۆا پروگرەسسيۆتى ءارى ادىلەتتى قازاقستان قۇرۋعا باعىتتالعان مەملەكەت باسشىسىنىڭ باستامالارىن قولداپ، ەلدىڭ ورتاق ماقساتتارى توڭىرەگىندە بىرىگۋگە شاقىردى.
