2022 جىلعى قاڭتار وقيعاسىندا ايىپتالعان قىرعىزستان ازاماتى ۆيكرام رۋزاحۋنوۆ ءوز ءىسى بويىنشا جاڭا دەرەكتەردىڭ بار ەكەنىن ايتتى، دەپ حابارلايدى "ادىرنا" ءتىلشىسى قازتاگ-قا سىلتەپ.
قىرعىزستاندىق مۋزىكانتتىڭ ءىسى قر باس پروكۋراتۋراسىنا بەرىلگەن.
ونىڭ ايتۋىنشا، وسى ۋاقىتقا دەيىن پوليتسيا قىزمەتكەرلەرىنىڭ تورتەۋى ۇستالىپ، قاماۋعا الىنىپتى.
"ولاردىڭ ءبىرى ازاپتاۋ مەن زورلىق-زومبىلىق فاكتىسىن مويىندادى، ەكىنشىسى “ساتىلعان” بلوگەرلەر مەن جۋرناليستەردى جالداپ، وتىرىك ادەتىنە باسىپ، ءتىپتى بالالارى مەن اناسىن العا تارتىپ، ءوزىن-ءوزى ورتەپ جىبەرەمىن دەپ قورقىتۋعا تىرىسادى", - دەدى ول.
ۆيكرام رۋزاحۋنوۆ تەرگەۋ جاڭا سەرپىن الا باستاعانىن جەتكىزدى.
"باس پروكۋراتۋرا ءىستى قيسىندى تۇردە اياقتايتىنىنا سەندىردى. پاگوندى 4 قىلمىسكەردىڭ ۇستالۋى - تەك باستاماسى عانا. قالعاندارى دا كوپ ۇزاماي قۇرىقتالادى. ەشكىم جاۋاپكەرشىلىكتەن قۇتىلا المايدى. ازاپتاۋعا، زورلىق-زومبىلىققا جول جوق. ءاۋ باستاعى تالاپ ازاپتاۋ جانە جالعان اقپارات تاراتۋ بويىنشا رەسمي كەشىرىم سۇراۋ بولعان ەدى. ەندى ىستە قوسىمشا دالەلدەر پايدا بولدى! تەرگەۋ جالعاسۋدا", - دەدى مۋزىكانت.
ايتا كەتەيىك، بۇدان بۇرىن استانا قالاسىنىڭ الماتى اۋداندىق سوتى قىرعىزستاندىق مۋزىكانت ۆيكرام رۋزاحۋنوۆتىڭ قازاقستان ءىىم اتىنا بەرگەن ار-نامىسىن، قادىر-قاسيەتىن جانە ىسكەرلىك بەدەلىن قورعاۋ تۋرالى ارىزىن قاناعاتتاندىرۋدان باس تارتقان.
ال قىرعىزستاندىقتىڭ ادۆوكاتتارى قر ءىىم-نەن رۋزاحۋنوۆتىڭ الماتىلىق پوليتسەيلەر قىسىمىمەن ايتىلعان ايعاقتارىن، ياعني قازاقستانعا 2022 جىلعى قاڭتارداعى تارتىپسىزدىكتەرگە قاتىسۋ ءۇشىن كەلگەنى جونىندەگى جاۋاپتارىن دۇرىس ەمەس دەپ تانۋدى جانە مۋزىكانتتان كوپشىلىك الدىندا كەشىرىم سۇراۋدى تالاپ ەتكەن بولاتىن.
2022 جىلدىڭ قاڭتار ايىنىڭ باسىندا قازاقستانداعى جاپپاي نارازىلىق كەزىندە قىرعىزتان ازاماتى قولعا تسۇكەن. ونى قازاقستاندىق قاۋىپسىزدىك كۇشتەرى ۇستاپ الىپ، اياۋسىز ۇرىپ، مەملەكەتتىك تەلەارنالار ارقىلى كورسەتكەن. ارتىنشا بىشكەك مۋزىكانتتىڭ ءىسى بويىنشا استاناعا رەسمي نوتا جولدادى. رەزونانس اياسىندا قازاقستاندىق بيلىك مۋزىكانتتى بوساتقان. وتانىنا ورالعاننان كەيىن ول ازاپتالعانىن جانە ءوزىن ايىپتى رەتىندە كورسەتۋگە ءماجبۇر بولعانىن مالىمدەدى.
