وڭتۇستىك استانادا احمەت بايتۇرسىنۇلىنىڭ مۋزەي-ءۇيىنىڭ اۋماعىنا گۇل وتىرعىزىلدى. يگى شاراعا بەلگىلى اقىن ۇلىقبەك ەسداۋلەت، ءانشى ءارى كومپوزيتور قادىرعالي كوبەنتاي، «ۇلت ۇستازى» تەلەحيكاياسىندا احمەت بايتۇرسىنۇلىنىڭ ءرولىن سومداعان تانىمال اكتەر بايعالي ەسەنالى جانە باسقا دا بەلگىلى مادەنيەت قايراتكەرلەرى مۇرىندىق بولدى.
ولار مۋزەي ۇجىمىمەن بىرگە بۇل جوبانىڭ قالا «ءومىرى» ءۇشىن ماڭىزدى ەكەنىن ايتتى. شاراعا ءال-فارابي اتىنداعى قازۇۋ ماگيسترانتتارى، اباي اتىنداعى قازۇپۋ ستۋدەنتتەرى مەن «احمەتتانۋ» وقۋ ورتالىعىندا تاعىلىمدامادان ءوتىپ جاتقان مەكتەپ وقۋشىلارى دا قاتىستى.
گۇل وتىرعىزۋ سازدى باعدارلاماعا ۇلاستى – جاس كۇيشى تولعاناي قاسەنوۆا كۇي ويناسا، ءانشى، بلوگەر ءدىلناز بەرداليەۆا جاسىل-جەلەك وتىرعىزۋ ناۋقانىنا قاتىسقاندار ءۇشىن بىرقاتار ءان ورىندادى.
ءىس-شارا سوڭىندا الماتى قالاسى مۋزەيلەر بىرلەستىگىنىڭ ديرەكتورى ءلاززات ساعىندىقوۆا بارلىق قاتىسۋشىعا العىس ءبىلدىردى، ال مۋزەي-ءۇيىنىڭ جەتەكشىسى، احمەتتانۋشى عالىم رايحان يماحانبەت ولارعا جازۋشى ديدار امانتايدىڭ «احمەت بايتۇرسىنۇلى: ءتىل مۇراتى، بولمىس فيلوسوفياسى» كىتابىن جانە ءوزىنىڭ «عاسىر ساڭلاعى» اتتى اۆتورلىق باسىلىمىن سىيعا تارتتى.
ايتا كەتەيىك، الماتى اكىمى ەربولات دوساەۆ قالادا ءبىر ايعا جالعاساتىن «الماتى – ءبىزدىڭ ورتاق ءۇيىمىز» ناۋقانى باستالعانىن جاريالادى.
ەستەرىڭىزگە سالا كەتەيىك، 8 ساۋىردە «الماتى – ءبىزدىڭ ورتاق ءۇيىمىز» ناۋقانى باستالدى. بۇگىندە قالا تۇرعىندارى شاھاردىڭ دامۋى مەن اباتتاندىرىلۋىنا ءوز ۇلەسىن قوسىپ كەلەدى.
