Ońtústik astanada Ahmet Baıtursynulynyń mýzeı-úıiniń aýmaǵyna gúl otyrǵyzyldy. Igi sharaǵa belgili aqyn Ulyqbek Esdáýlet, ánshi ári kompozıtor Qadyrǵalı Kóbentaı, «Ult ustazy» telehıkaıasynda Ahmet Baıtursynulynyń rólin somdaǵan tanymal akter Baıǵalı Esenáli jáne basqa da belgili mádenıet qaıratkerleri muryndyq boldy.
Olar mýzeı ujymymen birge bul jobanyń qala «ómiri» úshin mańyzdy ekenin aıtty. Sharaǵa Ál-Farabı atyndaǵy QazUÝ magıstranttary, Abaı atyndaǵy QazUPÝ stýdentteri men «Ahmettaný» oqý ortalyǵynda taǵylymdamadan ótip jatqan mektep oqýshylary da qatysty.
Gúl otyrǵyzý sazdy baǵdarlamaǵa ulasty – jas kúıshi Tolǵanaı Qasenova kúı oınasa, ánshi, bloger Dilnaz Berdalıeva jasyl-jelek otyrǵyzý naýqanyna qatysqandar úshin birqatar án oryndady.
Is-shara sońynda Almaty qalasy Mýzeıler birlestiginiń dırektory Lázzat Saǵyndyqova barlyq qatysýshyǵa alǵys bildirdi, al mýzeı-úıiniń jetekshisi, ahmettanýshy ǵalym Raıhan Imahanbet olarǵa jazýshy Dıdar Amantaıdyń «Ahmet Baıtursynuly: til muraty, bolmys fılosofııasy» kitabyn jáne óziniń «Ǵasyr sańlaǵy» atty avtorlyq basylymyn syıǵa tartty.
Aıta keteıik, Almaty ákimi Erbolat Dosaev qalada bir aıǵa jalǵasatyn «Almaty – bizdiń ortaq úıimiz» naýqany bastalǵanyn jarııalady.
Esterińizge sala keteıik, 8 sáýirde «Almaty – bizdiń ortaq úıimiz» naýqany bastaldy. Búginde qala turǵyndary shahardyń damýy men abattandyrylýyna óz úlesin qosyp keledi.
