يزرايل پرەمەر-ءمينيسترى بەنيامين نەتانياحۋ اقش پرەزيدەنتى دجو بايدەنمەن تەلەفون ارقىلى سويلەسكەننەن كەيىن يرانعا قارسى سوققىدان باس تارتتى. بۇل تۋرالى New York Times باسىلىمى جازدى، دەپ حابارلايدى “ادىرنا” ۇلتتىق پورتالى.
باسىلىمنىڭ حابارلاۋىنشا، يزرايل اسكەريلەرى 14 ساۋىردە يراننىڭ اسكەري وپەراتسياسىنا جاۋاپ بەرۋدى ودان ءارى تالقىلايدى.
يران قارۋلى كۇشتەرى باس شتابىنىڭ باسشىسى موحامماد باگەري وپەراتسيانىڭ ءساتتى وتكەنىن ايتقان.
بەلگىلى بولعانداي، 13 ءساۋىر كۇنى يران يزرايلگە زىمىران جانە ۇشقىشسىز ۇشاقتارمەن شابۋىل جاساعان. ال زىمىراندار يزرايل اۋماعىنان تىس جەردە ۇستالعان.
يەرۋساليمنەن باسقا، ءيزرايلدىڭ وڭتۇستىگى مەن سولتۇستىگىندە، شومرون ايماعىندا، سونداي-اق ءولى تەڭىز ۇستىندە اۋە شابۋىلىنىڭ سيرەنالارى ىسكە قوسىلعان. قاتتى جارىلىستىڭ داۋسى يەرۋساليمدە دە ەستىلگەن.
ايماقتاعى شيەلەنىس ءساۋىردىڭ 1-ءى كۇنى داماسكتەگى يران كونسۋلدىعىنا جاسالعان اۋە سوققىسىنان كەيىن ۋشىعا باستادى. شابۋىلدان يسلام رەۆوليۋتسياسى ساقشىلار كورپۋسىنىڭ جەتى مۇشەسى، ونىڭ ىشىندە ەكى گەنەرالدىڭ قازا تاپقانى ايتىلعان. تەگەران بۇل سوققىعا ءيزرايلدى جاۋاپتى دەپ سانادى، ال يراننىڭ رۋحاني جەتەكشىسى اياتوللا ءالي حامەنەي ءيزرايلدى «جازالايمىن» دەپ قورقىتقان بولاتىن.
