اقش پەن يران 19 ماۋسىم كۇنى شۆەيتساريادا بەيبىت كەلىسىمگە قول قويادى. بۇل تۋرالى ەكى ەل اراسىنداعى كەلىسسوزدەرگە دەلدال بولىپ جۇرگەن پاكىستاننىڭ پرەمەر-ءمينيسترى شاحباز شاريف ايتتى, دەپ حابارلايدى «ادىرنا» ءتىلشىسى.
ول تاراپتارعا «قاقتىعىستى ديپلوماتيالىق جولمەن شەشۋگە دەگەن ۇستانىمى ءۇشىن» العىس ايتىپ، كەلىسسوزدەرگە ارااعايىندىق جاساعان قاتارعا، سونداي-اق وسى باعىتتاعى ەلەۋلى ۇلەسى ءۇشىن ساۋد ارابياسى مەن تۇركياعا ريزاشىلىعىن ءبىلدىردى.
«كەلىسىمگە قول جەتكىزىلگەن سوڭ دەلدالدار وسى اپتادا بىرقاتار كەزدەسۋ ۇيىمداستىرادى. كەلىسىمدى ىسكە اسىرۋ الدىنداعى بۇل تالقىلاۋلار تەحنيكالىق كەلىسسوزدەرگە جانە رەسمي قول قويۋ راسىمىنە نەگىز بولادى»، - دەدى شاريف.
اقش پرەزيدەنتى دونالد ترامپ ءوزىنىڭ Truth Social الەۋمەتتىك جەلىسىندە يرانمەن جاسالاتىن بەيبىت مامىلە «ەندى تولىق كەلىسىلگەنىن» مالىمدەدى. سونىمەن قاتار اق ءۇي باسشىسى اقش اسكەري-تەڭىز كۇشتەرىنىڭ ورمۇز بۇعازىنداعى بلوكاداسىن الىپ تاستاۋدى تاپسىرعانىن حابارلادى.
«يران يسلام رەسپۋبليكاسىمەن كەلىسىم جاسالدى. بارشاڭىزدى قۇتتىقتايمىن. وسى ارقىلى مەن ورمۇز بۇعازىن كەمەلەردىڭ ەركىن ءوتۋى ءۇشىن اشۋعا رۇقسات بەرەمىن جانە سونىمەن بىرگە اقش اسكەري-تەڭىز كۇشتەرى تاراپىنان تەڭىز بلوكاداسىن دەرەۋ توقتاتۋ تۋرالى بۇيرىق بەرەمىن. الەمنىڭ بارلىق كەمەسى قوزعالىستى باستاسىن. مۇناي ەركىن اقسىن»،- دەدى پرەزيدەنت.
ترامپ بۇعازدى اشۋ 19 ماۋسىمدا يرانمەن كەلىسىمگە قول قويىلعاننان كەيىن جۇزەگە اساتىنىن اتاپ ءوتتى.
اقش ۆيتسە-پرەزيدەنتى دجەيمس دەۆيد ۆەنس كەلىسىمگە قول قويۋ راسىمىنە قاتىسۋدى جوسپارلاپ وتىرعانىن جەتكىزدى. ونىڭ سوزىنشە، جەنەۆاداعى كەزدەسۋگە ترامپتىڭ ءوزى دە كەلۋى مۇمكىن.
شاحباز ءشاريفتىڭ ايتۋىنشا، اقش پەن يران اسكەري ارەكەتتەردى بارلىق باعىتتا، سونىڭ ىشىندە ليۆاندا دا تۇپكىلىكتى توقتاتۋعا كەلىسكەن.
ليۆانعا قاتىستى تارماق يران ءۇشىن ماڭىزدى شارتتاردىڭ ءبىرى بولعان. سەبەبى ەل اۋماعىندا يزرايل مەن يران قولدايتىن حەزبوللا قوزعالىسى اراسىنداعى قاقتىعىستار جالعاسىپ كەلەدى. 14 ماۋسىمدا يزرايل بەيرۋتتاعى «حەزبوللا» باقىلاۋىنداعى اۋداندارعا كەزەكتى اۋە سوققىلارىن جاساعان ەدى. يزرايل بۇل ارەكەتىن قوزعالىس تاراپىنان جاسالعان شابۋىلدارعا جاۋاپ رەتىندە تۇسىندىرگەن. ال ترامپ يزرايل پرەمەر-ءمينيسترى بينيامين نەتانياحۋءنىڭ ارەكەتىن سىنعا العان بولاتىن.
يران سىرتقى ىستەر ءمينيسترىنىڭ ورىنباسارى كازەم گاريبابادي دە اقش-پەن قول جەتكىزىلگەن ۋاعدالاستىقتاردى راستادى. ونىڭ ايتۋىنشا، تاراپتار الدىمەن ءوزارا تۇسىنىستىك تۋرالى مەموراندۋمعا قول قويادى.
گاريباباديدىڭ سوزىنشە، 60 كۇن ىشىندە تۇپكىلىكتى بەيبىت كەلىسىم بويىنشا كەلىسسوزدەر جالعاسادى. وسى كەزەڭدە يران مەموراندۋم تالاپتارىنىڭ ورىندالۋىن مۇقيات باقىلاپ وتىرادى.
ءوز كەزەگىندە ترامپ بۇل كەلىسىمدى «بۇعان دەيىن ەشكىمنىڭ قولىنان كەلمەگەن تاريحي جەتىستىك» دەپ باعالادى.
ء«وڭىر باسشىلارى العاش رەت شىنايى بەيبىتشىلىككە قول جەتكىزۋگە كومەكتەسە الاتىن پرەزيدەنتتى تاپتى»، - دەپ جازدى ول.
ەسكە سالايىق، ترامپ 14 ماۋسىم كۇنى ءوز تۋعان كۇنىندە اقش ۆاشينگتون مەن تەگەران اراسىنداعى اتىستى توقتاتۋ تۋرالى كەلىسىمگە قول قويىلۋى مۇمكىن ەكەنىن مالىمدەگەن ەدى.
