اتىراۋداعى ساپار اياقتالدى. بۇل جولى قالا قاڭىراپ قالعانداي اسەر قالدىردى. كوشەدە بەيساۋات جۇرگەن جان جوق. ساپىرىلىسقان كولىكتەر دە ازايعان. ال، اۋەجاي، ۆوكزال، اۆتوبەكەتتەردە قۇجىناعان حالىق كوپ.
جۇرت جاپپاي جان-جاققا جانساۋعالاۋدا. قالاعا قارقىندى قىزىل سۋ كەلە جاتىر دەگەن ۇرەي ءبارىن بەيجاي كۇيگە ءتۇسىرىپتى. قۇلسارىداعى تاسقىندى كورگەندەر بەيقام ەمەس. بالا-شاعا، شال-شاۋقان مەن قىز-كەلىنشەكتەرىن اقتاۋ، اقتوبە، شىمكەنت، الماتىعا جىبەرىپ جاتىر. ءتىپتى كەيبىرى وتباسىمەن كولىككە ءمىنىپ، قاۋىپسىز قالالارعا اعىلىپ جاتىر. ەكى ادامنىڭ باسى قوسىلسا، “قالاعا سۋ كىرەر مە ەكەن؟”-دەگەن سۇراققا جاۋاپ ىزدەيدى.
جايىقتىڭ جاعاسى بەكىتىلىپ، ءار مەكەمە عيماراتىنىڭ جان-جاعىن قۇم تولتىرىلعان قاپپەن قالاپ جاتىر. جەر ۇيدە تۇراتىندار دا باسپانالارىن قورعاپ قالۋدىڭ قامىن جاساپ، قابىرعالارىنا تسەللوفانمەن گيدرويزولياتسيا جاساۋدا. ءتىپتى تەڭىزدىڭ كومەيى تازالانىپ، تابانى تەرەڭدەتىلۋدە. قالا ىشىندەگى قۇرعاپ قالعان كانالداردىڭ ارناسى اشىلىپ، جۇزدەگەن تەحنيكا كۇنى-ءتۇنى جۇمىس ىستەپ جاتىر. اسكەردە جۇرگەن 1500 جاۋىنگەر اتىراۋعا كەلىپ، ماحامبەت پەن يندەر اۋداندارىنا اتتانىپتى. ولار بوگەتتەر سالىپ، تاسقىندى قالاعا كەلتىرمەۋدىڭ قامىن جاسايدى.
ءبىر سوزبەن ايتقاندا، اتىراۋدا الاساپىران بولىپ جاتىر. 30 جىلدا جاسالماعان جۇمىستار سوڭعى 15 كۇندە اتقارىلۋدا. اكىمدەر، جانى مۇرنىنىڭ ۇشىنا تاقالعاندا تىپىرشىپ جاتىر. قايىنجۇرتقا تىنىشتىق تىلەيمىن. تاسقىن بولماي-اق قويسىن. اتىراۋعا تەك جاقسى دۇنيە جازۋ ءۇشىن كەلەيىك.
دياس نۇراقىن
