جامبىلدا جۇكتى ايەل ءوز-وزىنە قول جۇمساپ، كوز جۇمدى، دەپ حابارلايدى "ادىرنا" ءتىلشىسى قازاقپاراتقا سىلتەپ.
سارىسۋ اۋدانىنىڭ 33 جاسار تۇرعىنى ءوز-وزىنە پەرزەنتحانادا سۋيتسيد جاساعان. بۇل تۋرالى وبلىستىق دەنساۋلىق ساقتاۋ باسقارماسى ءباسپاسوز قىزمەتىندە بەلگىلى بولدى.
قايعىلى وقيعا تاراز قالاسىنداعى جامبىل وبلىستىق پەريناتالدىق ورتالىعىندا 10 ءساۋىر كۇنى ورىن العان.
«جۇكتى ايەل جالعان تولعاق دياگنوزىمەن وپس باقىلاۋىندا بولدى جانە ءتيىستى ەم الدى. جۇكتى جاعدايدا بولعان كەزدە پسيحولوگيالىق اۋىتقۋلار بايقالماعان. وقيعا ورنىنا جەدەل-تەرگەۋ توبى كەلدى. اتالعان فاكتىگە بايلانىستى قۇقىق قورعاۋ ورگاندارى 105-باپتىڭ 1-بولىگى، ياعني، ءوزىن-ءوزى ولتىرۋگە يتەرمەلەۋ بويىنشا سوتقا دەيىنگى تەرگەۋ امالدارىن باستادى، سوت-مەديتسينالىق ساراپتاماسى جۇرگىزىلىپ جاتىر. اقپارات تەرگەۋ اياقتالعاننان كەيىن جاريالانادى»، – دەلىنگەن ءباسپاسوز قىزمەتى تاراتقان رەسمي اقپاراتتا.
ول جۇكتىلىكتىڭ ون التىنشى اپتاسىندا بولعان. مارقۇمنىڭ ارتىندا جولداسى جانە 3 بالاسى قالدى. بالالارىنىڭ ۇلكەنى 6 جاستا، ال ەكەۋى بالاباقشاعا بارادى.
پوليتسيا اتالعان فاكت بويىنشا قىلمىستىق ءىس قوزعالىپ، جان-جاقتى تەكسەرۋ جۇمىستارى جۇرگىزىلىپ جاتقانىن ايتادى.
