سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ۇلىنىڭ تويىن 26 ساۋىرگە بەلگىلەدى دەگەن اقپارات تارادى، دەپ حابارلايدى "ادىرنا" ءتىلشىسى ۇلىسمەدياعا سىلتەپ.
ال مينيستر سۋ تاسقىنى كەزىندە توي وتكىزگەنى تۋرالى اقپاراتتى جوققا شىعاردى.
باق-تا ول «پرەزيدەنتتىڭ تاپسىرماسى بويىنشا العاشقى كۇننەن باستاپ سۋ تاسقىنىنان زارداپ شەككەن ايماقتاردا بولدى جانە جوسپارلانعان وتباسىلىق ءىس-شارالاردىڭ بارلىعى توقتاتىلدى» دەپ مالىمدەلگەن.
ال وزگە باق بەتتەرىندە وتكەن كۇنى سۋ رەسۋرستارى جانە يرريگاتسيا ءمينيسترى «قىز ۇزاتۋ» - قالىڭدىقتى جاڭا وتباسىنا ۇزاتۋ ءراسىمىن وتكىزگەنىن حابارلاعان. ال ەر جىگىت تاراپىنان ۇلكەن توي 26 ساۋىرگە بەلگىلەنگەنىن ايتتى.
ايتا كەتەيىك، 2024 جىلدىڭ ناۋرىز ايىنىڭ سوڭىندا مينيستر نۇرجان نۇرجىگىتوۆكە سۋ تاسقىنى ءۇشىن قاتاڭ سوگىس بەرىلگەن بولاتىن. سول كەزدە ول جۇمىستان كەتۋگە نيەتى جوق ەكەنىن مالىمدەگەن.
«ماعان قاتاڭ سوگىس جاريالاندى، ەندىگى جەردە اتقارىلعان جۇمىستار جەرگىلىكتى اتقارۋشى ورگاندارمەن جانە توتەنشە جاعدايلار مينيسترلىگىمەن بىرلەسە وتىرىپ جۇرگىزىلۋدە ، شارا قولداناتىن شىعار»، – دەپ جاۋاپ بەردى.
مينيستر مۇنداي تاسقىن سۋ كولەمى قازاقستان تاۋەلسىزدىگىنىڭ 30 جىلىنداعى رەكوردتىق كورسەتكىش ەكەنىن اتاپ وتكەن بولاتىن.
بۇگىندە سەگىز وبلىستا جەرگىلىكتى توتەنشە جاعداي رەجيمى جۇمىس ىستەۋدە.
ەسكە سالا كەتەيىك، مينيستر نۇرجىگىتوۆ تۋعان كۇنى قارساڭىندا سوگىس العان بولاتىن.
