باتىس قازاقستان وبلىسىندا جايىق وزەنىندەگى سۋ ارناسىنان اسىپ، ەلدى مەكەندەرگە قاۋىپ ءتوندىرىپ وتىر، دەپ حابارلايدى “ادىرنا” پورتالى قازاقپاراتقا سىلتەپ.
«قازگيدرومەت» رمك بقو فيليالىنىڭ 17 ءساۋىر كۇنگى ساعات 08:00-دەگى مالىمەتىنشە، بايتەرەك اۋدانى يانۆارتسەۆ اۋىلىنداعى گيدروبەكەتتە سۋ دەڭگەيى ءبىر تاۋلىكتە 16 سانتيمەترگە كوتەرىلىپ، 818 سانتيمەترگە (قاۋىپتى شەگى – 1 250 سم) جەتكەن.
سونداي-اق جايىقتىڭ دەڭگەيى ورال قالاسى تۇسىندا 779 (تاۋلىكتىك ءوسىم – 3 سم، قاۋىپتى شەگى – 850 سم), كوشىمدە 778 (+13, 850 سم), اقجايىق اۋدانى تايپاق اۋىلىندا 478 (+7, 850 سم) سانتيمەتردى كورسەتتى.
بايتەرەك اۋدانى كوشىم كانالىندا سۋ دەڭگەيى ءبىر تاۋلىكتە 13 سانتيمەترگە (834 سم) جوعارىلاپ، قاۋىپتى شەكتەن (800 سم) اسىپ كەتتى.
بايتەرەك اۋدانىنىڭ اكىمى مارات توقجانوۆتىڭ ايتۋىنشا، جايىق وزەنى بويىندا ورنالاسقان 20 ەلدى مەكەندە 22 مىڭداي ادام تۇرادى.
«ز ساۋىردەن باستاپ سۋ تاسقىنىنىڭ ەكىنشى كەزەڭىنە دايىندىق قىزۋ جۇرگىزىلۋدە. اتالعان ەلدى مەكەندەردى سۋدان امان الىپ قالۋ ءۇشىن بوگەتتەر تۇرعىزۋعا 3 مىڭعا جۋىق ادام، 250 ارنايى تەحنيكا جۇمىلدىرىلدى. بۇلاردىڭ ىشىندە الماتى قالاسى مەن اقتوبە وبلىسىنان كەلگەن تەحنيكا دا بار. ۇلكەن سۋ كەلگەن جاعدايدا ادامداردى كوشىرۋ ءۇشىن ءار اۋىلدىق وكرۋگتىڭ مەكتەبىندە ەۆاكۋاتسيالىق پۋنكتەر الدىن الا ازىرلەندى. يانۆارتسەۆ اۋىلدىق وكرۋگىنىڭ وزىندە 5 ەلدى مەكەن بار. مۇنداعى تۇرعىنداردى «جايىقمۇناي» كومپانياسى قابىلداۋعا دايىن» دەدى م.توقجانوۆ.
