Batys Qazaqstan oblysynda Jaıyq ózenindegi sý arnasynan asyp, eldi mekenderge qaýip tóndirip otyr, dep habarlaıdy “Adyrna” portaly QazAqparatqa siltep.
«Qazgıdromet» RMK BQO fılıalynyń 17 sáýir kúngi saǵat 08:00-degi málimetinshe, Báıterek aýdany Ianvarev aýylyndaǵy gıdrobekette sý deńgeıi bir táýlikte 16 santımetrge kóterilip, 818 santımetrge (qaýipti shegi – 1 250 sm) jetken.
Sondaı-aq Jaıyqtyń deńgeıi Oral qalasy tusynda 779 (táýliktik ósim – 3 sm, qaýipti shegi – 850 sm), Kóshimde 778 (+13, 850 sm), Aqjaıyq aýdany Taıpaq aýylynda 478 (+7, 850 sm) santımetrdi kórsetti.
Báıterek aýdany Kóshim kanalynda sý deńgeıi bir táýlikte 13 santımetrge (834 sm) joǵarylap, qaýipti shekten (800 sm) asyp ketti.
Báıterek aýdanynyń ákimi Marat Toqjanovtyń aıtýynsha, Jaıyq ózeni boıynda ornalasqan 20 eldi mekende 22 myńdaı adam turady.
«Z sáýirden bastap sý tasqynynyń ekinshi kezeńine daıyndyq qyzý júrgizilýde. Atalǵan eldi mekenderdi sýdan aman alyp qalý úshin bógetter turǵyzýǵa 3 myńǵa jýyq adam, 250 arnaıy tehnıka jumyldyryldy. Bulardyń ishinde Almaty qalasy men Aqtóbe oblysynan kelgen tehnıka da bar. Úlken sý kelgen jaǵdaıda adamdardy kóshirý úshin ár aýyldyq okrýgtiń mektebinde evakýaııalyq pýnkter aldyn ala ázirlendi. Ianvarev aýyldyq okrýginiń ózinde 5 eldi meken bar. Mundaǵy turǵyndardy «Jaıyqmunaı» kompanııasy qabyldaýǵa daıyn» dedi M.Toqjanov.
