سولتۇستىك قازاقستان وبلىسىنىڭ پوليتسەيلەرى WhatsApp جەلىسىندەگى چاتتاردى باقىلاپ، سۋ تاسقىنىنان زارداپ شەككەندەرگە كومەك سۇراعان ءاربىر ءۇشىنشى ءوتىنىش جالعان دەگەن قورىتىندىعا كەلدى، دەپ حابارلايدى “ادىرنا” ۇلتتىق پورتالى.
ىشكى ىستەر مينيسترلىگى قازاقستاندىقتاردى اقشا جىبەرۋدى سۇراعان ينتەرنەت-الاياقتارعا سەنبەۋگە شاقىرادى.
«پەتروپاۆلدى تاسقىن سۋ باسقالى بەرى قالا مەن وبلىستىڭ كوپتەگەن تۇرعىندارىنىڭ باسىن بىرىكتىرگەن ءتۇرلى WhatsApp توپتارى قۇرىلدى. ولاردا تۇرعىندار سۋ تاسقىنى جاعدايىن تالقىلاپ، ءوز تاجىريبەلەرىمەن بولىسەدى، زارداپ شەككەندەرگە كومەك ۇيىمداستىرادى. سولتۇستىك قازاقستان وبلىسى بويىنشا كريمينالدىق پوليتسيا باسقارماسىنىڭ قىزمەتكەرلەرى توپ اكىمشىلەرىمەن تۇراقتى بايلانىستا»، — دەپ حابارلادى قر ءىىم ءباسپاسوز قىزمەتى.
قازىر پوليتسەيلەر الاياقتىق بولۋى مۇمكىن اقپاراتتى مۇقيات تەكسەرىپ جاتىر.
«كوپشىلىك سۋ تاسقىنىنان زارداپ شەككەندەر تۋرالى، بانك كارتاسىنىڭ ءنومىرى جانە كومەك سۇراۋى بار جارنامالاردى ءجيى كەزدەستىردى. كيبەرقىلمىسپەن كۇرەس باسقارماسىنىڭ قىزمەتكەرلەرى مۇنداي جارنامالاردى تەكسەرۋدە: ولاردا كورسەتىلگەن ادامدار شىنايى ما، ولار شىنىمەن اقشا اۋدارۋ ۇسىنىلىپ وتىرعان شوتتارعا تيەسىلى مە؟ ءۇش كۇن ىشىندە التى بۇقارالىق چاتتا 50-گە جۋىق جالعان جارناما انىقتالدى – شامامەن ءاربىر ءۇشىنشى كومەك سۇراۋشى شىن مانىندە الاياق بولىپ شىقتى»، – دەيدى سولتۇستىك قازاقستان پوليتسيا دەپارتامەنتىنىڭ قىزمەتكەرى يۆان تەرزيدي.
الاياقتاردىڭ جارنامالارى الدەقاشان جويىلعان، ال ولاردىڭ اۆتورلارىنىڭ نومىرلەرى چاتتاردا بۇعاتتالعان.
«پوليتسيا ادامداردان قارجىلىق ماسەلەلەرگە قاتىستى كەز كەلگەن اقپاراتتىڭ دۇرىستىعىن تەكسەرۋدى سۇرايدى. سولتۇستىك قازاقستان وبلىسىنىڭ تۇرعىندارى كۇماندى جارنامالار مەن سىلتەمەلەردى WhatsApp + 7 747 429 0203 نومىرىنە تەكسەرۋ ءۇشىن جىبەرە الادى»، - دەپ قورىتىندىلادى ىشكى ىستەر مينيسترلىگى.
