جامبىل وبلىسى ازاماتتىق ىستەر جونىندەگى سوت القاسى قورداي اۋدانى تۇرعىندارىنىڭ جەر ۋچاسكەلەرىن «بتا بانككە» كەپىلگە بەرۋدى زاڭسىز دەپ تاۋىپ، جەردى تۇرعىندارعا قايتارىپ بەرۋ تۋرالى شەشىم شىعاردى. بۇل تۋرالى جوعارعى سوتتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
2006 جىلى "بتا بانك" مەن "قازەكسيم" جشس اراسىنداعى كرەديتتىك شارت نەگىزىندە جالپى كولەمى 14 مىڭ گەكتاردان اساتىن 16 جەر ۋچاسكەسى "قازەكسيم" جشس-ءنىڭ قارىزىن قامتاماسىز ەتۋ ءۇشىن بانككە كەپىلگە بەرىلگەن. جەر پايدالانۋشىلارى نەسيە شارتى مەن جەر ۋچاسكەلەرىنىڭ كەپىلگە بەرىلگەنى تۋرالى 2010 جىلدىڭ قىركۇيەك ايىندا بىلگەن.
2010 جانە 2017 جىلدارداعى سوت ۇكىمدەرىمەن "قازەكسيم" جشس باس ديرەكتورى، م.ك.ءابليازوۆ جانە باسقا دا ۇيىمداسقان توپ مۇشەلەرى سوتتالدى. ولاردان بانكتىڭ پايداسىنا ماتەريالدىق زالالدىڭ ەداۋىر سوماسى وندىرىلگەن.
«بورىشتى قايتارۋ بويىنشا ءوز مىندەتتەمەلەرىن ورىنداماۋىنا بايلانىستى 2011 جىلى جامبىل وبلىسىنىڭ پروكۋرورى "بتا بانكى" اق-نىڭ مۇددەسى ءۇشىن سوتقا تالاپ ارىزبەن جۇگىنگەن. 2011 جىلعى سوتتىڭ شەشىمىمەن "قازەكسيم" جشس-نەن بانكتىڭ پايداسىنا جاۋاپكەرلەردىڭ مۇلكىنەن ءوندىرىپ الۋ جولىمەن 3 ملرد.تەڭگەدەن استام قارىز ءوندىرىلدى. 2016 جىلدىڭ قىركۇيەك ايىندا جسو اتقارۋشىلىق ءىس جۇرگىزۋ ءوندىرىسى قوزعالىپ، “قازەكسيم" جشس كەپىلگە قويىلعان مۇلكىنە ءوندىرىپ الۋ بويىنشا اتقارۋشىلىق ارەكەتتەرى جاسالدى. 2018 جىلى اۋكتسيوندىق ساۋدا-ساتتىق جۇرگىزىلىپ، ونىڭ ناتيجەلەرى بويىنشا 5 جەر ۋچاسكەسى ساتىلىپ كەتكەن. سوت القاسى 2018 جىلعى سوت شەشىمى زاڭسىز دەگەن شەشىمگە كەلدى، سەبەبى ول جەر ۋچاسكەلەرى "قازەكسيم" جشس-نە زاڭسىز بەرىلگەنىن انىقتاپ، وسىعان بايلانىستى جەر ۋچاسكەلەرى قورداي اۋدانىنىڭ تۇرعىندارىنا قايتارىلۋعا جاتادى دەپ تاپتى»،— دەلىنگەن حابارلامادا.
